1 Pedro 2 - U Maganda A Baheta Ni Jesu-Cristo

¹ Kanya adággen moy dán u atanan a mágkadukás, u pakándaya, pakánwari-ware, kákkaiyamut, sakay pakán upos ti awan ti pinagseserbiyan tu agum.

² Dapat kam a mauwaw tu Upos nu Diyos, konna tu kákkauwaw nu anak ti gatas, tánni bumegsák u pánnampalataya moy hanggan matanggap moy u kaligtasan.

³ Dipo kinagi na tu Kasulatan, “Naranasan moy dán u kabaitan nu Panginoon.”

⁴ Kanya umadene kam nikuna; siya u mangatád ti biyag sakay siya u konna tu bito a inadiyan nu tolay hide pero pinile nu Diyos a pinakamahalaga tu pangileng na.

⁵ Nadid, ay tehhod kamon a bigu a biyag a gábwat tu Diyos. Sakay nagkaessa kam a nagin konna tu essa a Templo. Kumán kam a bito a biyag a ginimet a templo na. Konna kam be tu essa a saserdote a nelaan para tu Diyos. U alay a ispiritwal a makasaya tu Diyos ay u págserbi moy nikuna alang-alang ni Jesu-Cristo.

⁶ Dipo kinagi na tu Kasulatan a, “U pinile ko a bito ay indátton ko ti Sion dipo mahalaga itod a bito. Ni ti deyaman u maniwala ti pinile kuwan iye ay awan mapasanike.”

⁷ Kanya i bituwan itod ay mahalaga nikitam a maniwala hide. Pero tu awan hide maniwala ay hide u mangpatunay tu Kasulatan, “U bito a inumádden nu mágbilay hide ay siya bál u mahalaga a mangtággád tu bilay.”

⁸ Sakay nakasulat be a, “Itod labe a bito u kesángdulan sakay kehakpaan nu tolay hide.” Nesángdul hide dipo awan hide sumunud tu upos nu Diyos, sakay iye u inhanda nu Diyos para nide.

⁹ Pero hikam u lahe hide a pinile nu Diyos, a magin saserdote na a magserbi tu tatahoden a Hare, essa a bansa para tu Diyos. Pinile kitam nu Diyos a magin sakup na sakay mángpakapos-pos tu makataka-taka hide a ginimet na a mágkaganda. Siya be u náng agton nikitam tu makataka-taka a demlag na nikuna a katoy kitam palla tu kadiklámman.

¹⁰ Tu itod ay bakán kam palla a sakup nu Diyos pero nadid ay sakup na kamon. Awan nikam tu itod u kagbi nu Diyos, pero nadid ay hod dán nikam u kagbi na.

U Tagapagserbi hide nu Diyos

¹¹ Kákkapatkákka ko hide, bakán a munduwáy u permamente tam a págyanan nan kumán kitam la a bisita ti iye. Kanya mákkekagbiyák nikam, adággen moy dán u mágkadukás a kagustuwan nu bággi moy dipo ina u mangsida tu kássunud moy tu Diyos.

¹² Dapat kitam a mabiyag ti maayus tu atubang nu Hentil hide, ta maski ni bintangán dikam ti madukás, pero ketan de u mágkaganda moy a gimet ay magpure hide tu Diyos káddemát nu aldew a kássole na.

¹³ Alang-alang tu Panginoon ay magpasakup kam tu tehhod hide a tungkulin tu banuwan moy sakay tu Hare a siya u pinakataas a pinuno tu lugar tam.

¹⁴ Sunudán moy be u gubernador hide a pinaangay na tán magparusa tu makángimitán hide ti madukás sakay hide be u magparangal tu makán gimitán hide ti maganda.

¹⁵ Gusto nu Diyos a gimitán tam u tama tán tumahan u tolay hide a apehet ti pággisipan a mágga-upusán ti baka-bakán kontara tu upos nu Diyos.

¹⁶ Mabiyag kitam a konna tu tolay hide a tehhod a kalayaan. Pero diyan moy gimitán u kalayaan a iye tu pággimet ti madukás nan mabiyag kam bilang alipin nu Diyos.

¹⁷ Igalang moy u atanan a tolay sakay mahalán u kákkapatkákka tam ni Cristo. Mabiyag kam a tehhod a ánteng tu Diyos sakay tehhod a pággalang tu Hare.

Ahigán Tam u Pághirap ni Cristo

¹⁸ Hikam a utusan hide, igalang moy sakay sunudán u amu moy sakay pasakup kam nide, bakán la a tu mágkabait hide nan pate be tu amu moy a awan makákkagbiyán.

¹⁹ Dipo u magtiis ti págpahirap maski ni awan siya ti ginimet a madukás ay kahabagen nu Diyos ni tiniis na iye dipo tu kássunud na tu kagustuwan nu Diyos.

²⁰ Awan ti seserbi u págtiis moy ti parusa ni dipo tu ginimet moy a madukás. Dipo awan kam kasayaan nu Diyos. Pero ni pápparusaan kam maski maganda u gággimitan moy, ay kasayaan kam nu Diyos.

²¹ U págtiis ti hirap ay kaguman tu pángpile nikam nu Diyos; dipo maski ti Cristo ay nagtiis ti hirap para nikam, I págtiis naan iye ay essa a halimbawa a dapat moy a ahigán.

²² Maski nikan ay awan siya nagkasala sakay nagbule-bule.

²³ Awan siya gummante nikuna a dustaán siya, sakay awan siya ti kákkagi nikuna a pahirapan de nan impabahala na u atanan tu Diyos dipo u Diyos la u tapat a huwes.

²⁴ Ti Cristo ay naparusaan dipo tu kasalanan tam. Nepako siya tu kudus tánni hummintu kitamon tu págkasala a konna tu patay a awan dán magkasala, sakay sumunud kitamon tu kagustuwan nu Diyos. Sakay dipo tu talingu na hide ay nagpiyya kitamon.

²⁵ Dipo kumán kam a tupa a nágketawtaw pero nadid ay inipun kamon a huway nu Diyos tu pamamag-itan ni Jesus a pastol tam a mággalaga tu kaliduwwa tam.