1 Juan 3 - U Maganda A Baheta Ni Jesu-Cristo

U Anak hide nu Diyos

¹ Isipán moy la ni sakodya ti kadakál u págmahal nikitam nu Ama. Dinulawan na kitam a anak na, a itona ngane u tatahoden. Iye u dahilan ni bakin awan kitam kilala nu makamundo hide a tolay dipo awan de tenggiyán u Diyos.

² Mahal ko hide a kákkapatkákka, anak kitamon nadid nu Diyos. Pero awan padla ketan ni ánya u magin kalagayan tam. Tukoy tam a tu káddemát a huway ni Cristo ay magin konna kitam nikuna dipo ketan tam a talaga siya.

³ Kanya ni ti deyaman u te konna he a pag-asa ay dapat a mabiyag a tehhod a kalinisan, konna ni Cristo.

⁴ U atanan a magkasala ay awan sumunud tu kautusan nu Diyos dipo u kasalanan ay kássuway tu kautusan.

⁵ Tukoy moy a ti Cristo ay awan ti kasalanan sakay kaya he siya a immangay ay para ibutan u kasalanan tam hide.

⁶ U nákpagkaessa nikuna ay awan dán magtulos-tulos tu kasalanan. Ni ti deyaman u tulos-tulos a maggimet ti kasalanan ay awan palla tumenggi oni summampalataya ni Cristo.

⁷ Anak ko hide dyan kam paloko maski ni deya man. U maggimet ti maganda ay essa a matuwid a tolay, konna ni Cristo.

⁸ U magtulos-tulos a maggimet ti kasalanan ay kaessa ni Satanas dipo sapul pa tu itod ay mággagimitán dán siya ti kasalanan. Kaya ummangay he u Anak nu Diyos ay para sidaán u gimet ni Satanas.

⁹ U tatahoden a anak nu Diyos ay awan magtulos-tulos a maggimet ti kasalanan dipo katoy nikuna u biyag a gábwat tu Diyos. Sakay dipo u Diyos dán u ama na, awan dán siya maare a magtulos-tulos a maggimet ti kasalanan.

¹⁰ Hed tam he a matukuyan ni deya u anak nu Diyos sakay ni deya u anak ni Satanas: Ni deya man u awan maggimet ti maganda sakay awan magmahal tu kapatkákka na ay bakán a anak nu Diyos.

Magmahalan Kitam

¹¹ Sa iye u adal a nasaneg moy dán sapul nikuna a simmampalataya kam ni Jesus: Magmahalan kitam.

¹² Dyan kitam umaheg ni Cain; Naghare nikuna ti Satanas. Binuno na u wadi na. Bakin? Dipo madukás u gimet na pero matuwid u gimet nu wadi na.

¹³ Kanya kákkapatkákka, dyan kam magtaka ni kaiyamutan kam nu tolay hide ti munduway.

¹⁴ Tukoy tam a inumagton kitamon tu biyag gábwat tu kamatayan. Tukoy tam iye dipo mahal tam u kákkapatkákka tam hide. U awan magmahal ay manatile a hiwalay tu Diyos.

¹⁵ Mágbabono u maiyamut tu kákkapatkákka na sakay tukoy tam a awan ti biyag a awan ti kahád u essa a mágbabono.

¹⁶ Hed tam he a matukuyan u tatahoden a págmahal: inyalay ni Cristo u biyag na para nikitam. Kanya dapat be a iyalay tam u biyag tam para tu kákkapatkákka tam hide.

¹⁷ Ni ketan nu te anggen a tehhod a kailangan u kapatkákka na sakay awan na iye tinulungan ay kodya na a makagi a mahal na u Diyos?

¹⁸ Anak ko hide, u págmahal tam ay dapat bakán la atu upos, nan ipeta tam tu pamamag-itan nu gimet tam a ayun tu tatahoden.

Mapayapa a Isip tu Atubang nu Diyos

^19-20 Ni konna he u págmahal tam, nakasigudu kitam a nabiyag kitam ayun tu tatahoden. Ni balisaán kitam man nu konsensiya tam, maare kitam a umatubang tu Diyos a mapayapa ta tukoy tam a u Diyos, ay makákkagbiyán kasera tu konsensiya tam sakay tukoy na a atanan.

²¹ Mahal ko hide a kákkapatkákka, ni awan kitam balisaán nu konsensiya tam, ay mapayapa u isip tam a umadene tu Diyos.

²² Matanggap tam u ánya man a agidán tam nikuna dipo sássunudán tam u utus na sakay gággimitán tam u makasaya nikuna.

²³ Sa iye u utus na: Maniwala kitam tu Anak na a ti Jesu-Cristo sakay magmahalan kitam konna tu inyutus nikitam ni Cristo.

²⁴ U sumunud tu utus nu Diyos ay mákkaessa tu Diyos sakay mákkaessa be u Diyos nikuna. Tukoy tam a nákkaessa u Diyos nikitam dipo tu Banal a Ispirito a inyatád na nikitam.