1 Juan 2 - U Maganda A Baheta Ni Jesu-Cristo

Ti Cristo u Tagasuhog Tam

¹ Anak ko hide, insulat ko iye hide nikam tánni awan kam magkasala. Pero ni magkasala man u deyaman ay te mángsuhog nikitam, u Ama. Siya ay ti Jesu-Cristo, u Matuwid.

² Inyalay ni Cristo u bággi na para mapatawad u kasalanan tam hide, sakay bakán la a u kasalanan tam hide nan pate u kasalanan nu atanan a tolay.

³ Nakasigudu kitam a kilala tam u Diyos ni sássunudán tam u utus na hide.

⁴ Ni ti deya man u magkagi a “Kilala ko siya” pero sumuway labe tu utus na hide ay mabule sakay awan nikuna u tatahoden.

⁵ Pero ni u tolay ay sumássunud tu upos nu Diyos ay mángpeta iye a u págmahal nu Diyos ay nagin ganap tu biyag na. Konna he u pakatukuyan tam a atoy kitam nikuna.

⁶ Ni ti deya man u magkagi a nákpagkaessa siya tu Diyos ay dapat a mabiyag a konna tu kákkabiyag ni Jesu-Cristo.

U Bigu a Utus

⁷ Mahal ko hide a kákkapatkákka, bakán a bigu a utus u insulat ko nikam nan u date dán a utus a katoy dán nikam tu itod pa. Iye a mensahe ay nasaneg moy dán.

⁸ Pero mebilang a bigu a utus i insulat kuwáy nikam; metan i tatahodinan iye tu biyag ni Cristo sakay tu biyag moy. Dipo mawan dán u kadiklámman sakay mágdadedemlag dán u tunay a demlag.

⁹ U magkagi a katoy siya tu demlag pero maiyamut labe tu kapatkákka na ay atoy padla tu kadiklámman.

¹⁰ U magmahal tu kapatkákka na ay katoy tu demlag kanya awan siya magin dahilan nu pagkasalaan nu agum.

¹¹ Pero u maiyamut tu kapatkákka na ay katoy padla tu kadiklámman. Maglakad padla siya tu kadiklámman sakay awan na tukoy u tamuwan na, ta binuhák siya nu kadiklámman.

¹² Magsulaták nikam a anak ko hide, dipo pinatawad dán nu Diyos u kasalanan moy dipo tu ginimet ni Cristo.

¹³ Magsulaták nikam a ama hide, ta nakilala moy siya a tu sapul ay átna dán siya. Magsulaták be nikam, áolito hide sakay mámmadiket, dipo natalo moy dán ti Satanas.

¹⁴ Magsulaták nikam anak hide, dipo kilala moy u Ama. Magsulaták be nikam ama hide, dipo kilala moy siya a tu sapul ay átna dán. Magsulaták nikam áolito hide sakay mámmadiket hide dipo mágkatatag kam; pirme a katoy nikam u upos nu Diyos sakay natalo moy dán ti Satanas.

¹⁵ Dyan moy sunudán u makamundu a kákkabiyag nu tolay hide ti munduway oni u bagay hide a katoy tu mundu. U magmahal ti munduway ay awan magmahal tu Ama.

¹⁶ Dipo u tolay a makamundu ay iye u metan nide. U kákkasoh tu pilas, kákkasoh tu ketan hide sakay u pághambug. U atanan a iye ay bakán a gábwat tu Ama nan gábwat tu mundo.

¹⁷ Iye hide sakay i munduway ay mawan pero u sumunud tu kagustuwan nu Diyos ay mabiyag hanggan-hanggan.

U Kontara ni Cristo

¹⁸ Anak ko hide, adeni dán u katapusan a panahun! Konna tu nasássaneg moy dán a dumemát u kontara ni Cristo. Kanya nadid ay makpal dán a pummeta a kontara ni Cristo hide. Kaya tukoy tam a adene dán u katapusan.

¹⁹ Maski ni date tam hide a kaguman pero awan tam hide kaessa. Dipo ni talaga a kaessa tam hide ay kakaguman tam nakwa hide nadid. Pero summina hide, kanya nángpeta la a awan tam hide talaga a kaessa.

²⁰ Pero inyatád dán nikam u Banal a Ispirito kaya tukoy moy dán u tatahoden.

²¹ Magsulaták nikam bakán a dipo awan moy palla tukoy u tatahoden nan dipo tukoy moy dán iye. Sakay tukoy moy be a awan ti kakabuliyan a maggábwat tu tatahoden.

²² Deya beman u mabule? Awan beman u magkagi a ti Jesus ay bakán a Cristo? Ni deyaman u magkagi he ay kontara ni Cristo, dipo umád de kilalaán u Ama sakay u Anak.

²³ U awan tumenggi tu Anak ay awan be tumenggi tu Ama. Ni deya man u tumenggi tu Anak ay tumenggi be tu Ama.

²⁴ Pakaingatan moy tu puso moy u nasássaneg moy tu sapul nikuna summampalataya kam ni Jesus. Ni gimitán moy iye ay manatili kam a kaessa nu Anak sakay tu Ama.

²⁵ Sakay sa iye u inpananto nikitam ni Cristo: Biyag a awan ti kahád.

²⁶ Insulat ko iye nikam tánni babalaan kam tu tolay hide a masoh a mángtawtaw nikam tu liwat de a toldu.

²⁷ Pero maski ni magkakonna hod ay katoy dán nikam u Banal a Ispirito a inyatád ni Cristo. Mentaras a katoy nikam u Banal a Ispirito ay awan kamon kailangan a tolduwan ni deya man. U Banal a Ispirito u mángtoldu nikam tu atanan, sakay u atanan a itoldu na ay tatahoden, bakán a kakabuliyan. Kanya manatili kam ni Cristo dipo ina u intoldu nikam nu Ispirito.

²⁸ Kanya ngane anak hide, itulos-tulos moy u pákkaessa moy ni Cristo tánni káddemát na a huway ay mabegsák u isip tam sakay awan kitam masanike nikuna ti aldiwan itod.

²⁹ Ni tukoy moy a matuwid ti Cristo, ay dapat tukoy moy be a u atanan a mággimet ti matuwid ay anak nu Diyos.