1 Corinto 9 - U Maganda A Baheta Ni Jesu-Cristo

U Karapatan sakay Tungkulin nu Essa a Apostol

¹ Awan beman malayaák? Awan beman apostolák? Awan beman netan ko ti Jesus a Panginoon tam? Awan beman hikam u bunga nu págserbi ko tu Panginoon?

² Tu agum ay awanák de tenggiyán a apostol pero tukoy ko a kilalaánnák moy a apostol! Dipo hikam a mismo u patunay a apostolák nu Panginoon, dipo simmampalataya kam tu Diyos tu pamamag-itan nu intoldu ko.

³ Sa iye u tábbeg ko tu awan hide mangkilala tu pagkaapostol ko.

⁴ Awan kame beman ti karapatan a umasa tu mannampalataya hide tu kailangan me hide?

⁵ Ni te kabanga kame, awan kame beman ti karapatan a mangkuyog tu kabanga me a mánnampalataya a konna tu gággimitán ni Pedro, a konna tu agum hide a apostol sakay kákkapatkákka nu Panginoon tam?

⁶ Hikame beman la ay ti Bernabe u kailangan a magtrabaho para tu kákkabiyag me?

⁷ Tehhod beman a sundalo a siya pa u manggastus tu págserbi na? Tehhod beman a magmula a awan makinabang tu bunga nu immula na? Tehhod beman a magalaga ti tupa a awan makinabang tu gatas nu tupa na?

⁸ U kákkagiyán ko ay awan la neayun tu isip nu tolay; nan konna be hod u nesulat tu Kautusan.

⁹ Dipo nakasulat tu Kautusan ni Moises: “Dyan mo busalan u baka mentras a pagággik nan pabayan mo a kuman.” Bakin u baka beman hide u pospusan nu Diyos?

¹⁰ Awan! Hikitam u gusto a kagiyan nu Diyos. Nesulat iye para nikitam, dipo u mággaradu sakay u mággággik ay pareho a umasa tu kabunong de.

¹¹ Minulaan mikam ti ispiritwal a págpapala; kanya awan beman dapat la a magane kame nikam tu kailangan me hide?

¹² Ni u agum hide a mángngaral ay tehhod a karapatan, di mas lalu kame dán! Pero maski ni konna pa man hod ay awan me ginamit iye a karapatan. Nan tiniis me u atanan tanni awan kame magin hadlang tu Maganda a Baheta tungkul ni Cristo.

¹³ Awan moy beman tukoy a u magserbi hide tu templo ay tumanggap tu makan a gábwat tu templo, sakay u mágserbi hide tu altar ay tehhod be hide a kabahagi tu alay a katoy tu altar?

¹⁴ Konna labe hina, inyutus nu Panginoon a u timmanggap tu Maganda a Baheta ay dapat tumulong tu kailangan hide nu mángngaral hide tu Maganda a Baheta.

¹⁵ Pero awan ko ginamit iye hide a karapatan, sakay awanák nadid nagsulat nikam tán atáddinák moy ti tulung. Mas gustuwán ku pa a matayák ti aláp nan mák-agidák sakay itod u magin dahilan para awan ku dán mepagmadakál a itáttoldu ko u Maganda a Baheta ti libre.

¹⁶ Bakán a dipo a mángngaralák tu Maganda a Baheta ay maariyák dán a magmadakál. Ina u tungkulin a netalaga nikán. Kakagbiyák ni awan ko ibaheta u Maganda a Baheta!

¹⁷ Ni gimitán ko iye tu sadile ko a kagustuwan ay tehhodák a mauhay a upa; pero u tatahoden gimitán kula u tungkulin ko dipo iye u nepagkatiwala nikán nu Diyos.

¹⁸ Anya nadid i mauhay kuway a gantimpala? Awan ti agum nan u págtoldu ko tu Maganda a Baheta ti libre sakay tu awan ko káasa tu karapatan ko a mangaged bilang mángngaral.

¹⁹ Malayaák sakay awanák alipin nu deyaman; pero nagpaalipinák tu atanan tánni makaakiták la ti makpal para sumampalataya tu Panginoon Jesu-Cristo.

²⁰ Kapag ni hedák tu Judio hide ay mabiyagák a konna tu essa a Judio tánni maakit ko hide a sumampalataya ni Jesu-Cristo. Maski ni awanák sakup nu Kautusan nu Judio hide ay sinunud ko iye tánni sumampalataya la hide.

²¹ Kapag ni hedák tu Hentil hide, a awan makatukoy tu Kautusan ni Moises ay mabiyagák a konna tu essa a tolay a awan sakup nu Kautusan tánni maakit ko be hide. (Pero awan ko kákkagiyán a awanák dán sumássunud tu Kautusan nu Diyos dipo u sássunudán ko ay u utus hide ni Cristo.)

²² Ni hikán ay hod tu mágkahina hide ti pánnampalataya ay mákbagayák para mapabegsák ko hide ni Cristo. Nákbagayák tu atanan a tolay, tánni maskin tu ánya a paraan ay maakit ko u agum nide a sumampalataya ni Jesu-Cristo para maligtas hide.

²³ Gággimitán ko iye a atanan dipo tu Maganda a Baheta, tánni mákbahagiyák tu págpapala ni iye.

²⁴ Tukoy moy a u kasale tu ginanan ay sabay-sabay a magginan, pero eessa la u makatanggap ti gantimpala! Kaya husayán moy a magginan tánni makatanggap kam ti gantimpala.

²⁵ Atanan nu máksale tu ayam ay kailangan a magpugád tu sadile na tu atanan a bagay. Tánni matanggap na u gantimpala na a pang-alistuwan. Pero u gantimpala a gusto tam ay u gantimpala a panghanggan-hanggan.

²⁶ Kaya ngani a tehhod a tamuwán u págginan ko. Sakay awanák sumuntuk tu pahás.

²⁷ Disiplinaán ko u sadile ko sakay magpugáddák, dipo ni awan, bakay káttapos ko a magbaheta tu Maganda a Baheta tu agum ay hikán pa u awan makatanggap ti gantimpala.