1 Corinto 8 - U Maganda A Baheta Ni Jesu-Cristo

Tungkul tu Makan a Inyalay diyos-diyosan

¹ Nadid, iye u metábbeg ko tu tanung moy tungkul tu makan a nealay tu diyos-diyosan hide. Tukoy tam, “a tehhod kitam a karunungan a atanan.” Iye a “karunungan” u rason tánni magin palalo u tolay, pero u págmahal u makapangpatibay nikitam.

² U tolay a magkagi a makpal dán siya a tukoy, ay kulang palla a talaga u tukoy na.

³ Pero u mangmahal tu Diyos u kilalaán na a kao na.

⁴ Kaya tungkul tu makan a nealay tu diyos-diyosan hide, tukoy tam a awan tatahoden iye hide a diyos. Sakay tukoy tam be a eessa u Diyos.

⁵ Maske ni te kákkagiyán a makpal a diyos ti langet oni ti lutaáy, sakay mákpal pa a ngángngahanan a “diyos hide” sakay “panginoon hide,”

⁶ para nikitam ay eessa la u Diyos, u Ama a nanglalang tu atanan a bagay, sakay biyag kitam para nikuna. Eessa u Panginoon, ti Jesu-Cristo: tu pamamag-itan na ay nilalang u atanan a bagay sakay tu pamamag-itan na ay biyag kitam.

⁷ Pero awan atanan ay makatukoy ti iye. U agum ay nasanay ti itod a magsamba tu diyos-diyosan, kaya hanggan nadid, kapag ni kuman hide ti konna he ay u akala de ay alay padi tu diyos-diyosan u kákkanán de. Dipo wad a kulang u karunungan de, kaya mabalisa hide tu buung akala de a nagkasala hide.

⁸ Bakán a dipo tu makan kaya kitam a karapat-dapat tu Diyos. Awan ti mawan nikitam ni awan kitam kuman ti konna hod a makan, sakay awan labe ti meatád a maganda ni kuman kitam man he.

⁹ Pero mag-ingat kam, bakay tu kalayaan moy a kuman ti ánya man a makan ay magin rason a pagkasalaan nu mágkahina hide ti pánnampalataya.

¹⁰ Pero hikam a mas nakatukoy ti iye, ay kuman tu disalad nu templo nu diyos-diyosan hide, sakay netan kam nu mágkahina palla hide ti pánnampalataya, awan wád hide meaheg a kuman ti itod a nealay tu diyos-diyosan hide maski para nikuna ay kasalanan iye?

¹¹ U ginimet mo a itod u nagin dahilan nu págkasala nu kapatkákka moy a mahina palla ti pánnampalataya. A natubos be tu kákkatay ni Cristo.

¹² Dipo hod ay nagkasala kam ni Cristo dipo hikam u dahilan nu págkakasala nu kapatkákka moy dipo u ginimet mo u nángtoglad nikuna para maggimet ti bagay a labag tu kaluuban na.

¹³ Kaya ni tu makan la u dahilan a pagkasalaan nu kapatkákka ko ay dyanák dán kuman ti karne tánni awan siya magkasala.