1 Corinto 7 - U Maganda A Baheta Ni Jesu-Cristo

U Tanung Tungkul tu Pákkabanga

¹ Nadid, sa iye u makagi ko tungkul tu sulat moy nikán: mas maganda pa ni awan dán mákkabanga u essa a lállake.

² Pero para maiwasan u pángngibábbey sakay pángngilállake, ay masmaganda a magkahod ti kabanga u bawat lállake sakay bábbey.

³ Dapat tupadán nu lállake u tungkulin na tu kabanga na, sakay dapat konna bi hod u gimitán nu bábbey.

⁴ Dipo bakán dán a u bábbey u tehhod a karapatan tu sadile na a bággi nan u kabanga na dán; konna bi hod tu lállake, bakán dán a siya la u te karapatan tu sadile na a bággi nan u kabanga na dán.

⁵ Kanya dyan moy ikemot a mákduhog tu kákkabanga moy, maliban dálla ni napagkasunduwan moy a dyan kam palla magduhog, tánni melaan u panahun moy tu págdasal. Pero káttapos ay maare kamon a magduhog tánni awan kam matokso ni Satanas dipo la a awan kamon makapagpugád tu sadile moy.

⁶ I kinagi kuwáy nikam ay bakán a utus nan payo tu kalagayan moy.

⁷ Gusto ko nakwa a umaheg kam nikán a atanan. Pero bawat essa nikitam ay tehhod a kanya-kanya a kaluub a gábwat tu Diyos, sakay awan iye pare-pareho.

⁸ Sa iye u makagi ko tu mámmadiket sakay tu bábbelo hide a bábbey: mas maganda pa ni awan kamon mákkabanga a konna nikán.

⁹ Pero ni awan hide makapagpugád tu sadile de ay mas maganda pa ni mákkabanga dálla hide; dipo mas maganda pa ni mákkabanga nan ni awan makapagpugád tu sadili de dipo tu kákkasoh de.

¹⁰ Sa iye u utos hide tu tehhod hide a kabanga, bakán iye a gábwat nikán nan gábwat tu Panginoon: dyan mákhiwalay u bábbey tu kabanga na.

¹¹ Pero ni mákhiwalay siya ay itulos-tulos na a awan ti kabanga oni awan ay mákpagkasundu dálla siya a huway tu kabanga na. Sakay dyan be hiwalayan nu lállake u kabanga na.

¹² Para tu agum, sa iye u makagi ko: ni u essa a lállake a mánnampalataya ay tehhod a kabanga a awan mánnampalataya sakay gusto na palla a mák-agum nikuna ay dyan na siya hiwalayan.

¹³ Ni u essa a mánnampalataya a bábbey ay tehhod a kabanga a awan mánnampalataya sakay u lállake ay masoh palla a mák-agum nikuna ay dapat awan na hiwalayan u kabanga na.

¹⁴ Dipo u lállake a awan mánnampalataya ay magin karapat-dapat tu Diyos dipo tu kabanga na a mánnampalataya. Sakay u bábbey a awan mánnampalataya ay magin karapat-dapat dipo tu kabanga na a mannampalataya. Kaya u anak de hide ay malinis dán tu atubang nu Diyos dipo imbilang dán nu Diyos a malinis u págkabanga de.

¹⁵ Pero ni masoh a máksina u awan mánnampalataya tu kabanga na, pabayan moy siya a máksina. Tánni u lállake oni u bábbey a mánnampalataya ay malaya dán. Dipo dinulaw kitam nu Diyos tu mapayapa a biyag.

¹⁶ Pero ánya tukoy moyay hikam a bábbey hide, bakay hikam i magin dahilanay nu kákkaligtas nu kákkabanga moy? Hikam be a lállake hide, ánya tukoy moyay, bakay hikam i magin dahilanay nu kákkaligtas nu kákkabanga moy?

Manatile tu Date a Kalagayan

¹⁷ Mabiyag u balang essa, ayun tu impagkaluub nikuna nu Panginoon, sakay magtulos-tulos tu date na a kalagayan ti biyag nikuna dulawán siya nu Diyos. Ina u itáttoldu ko tu atanan a mánnampalataya.

¹⁸ Ni mara la nature dán u essa a tolay nikuna dulawán siya nu Diyos ay dyan na dán ibutan u tanda nu pagigin ture na; ni awan pálla nature ay dyan dán siya magpature.

¹⁹ Awan ti halaga ni ture u essa a tolay oni awan ture u mahalaga ay u kássunud tu utus hide nu Diyos.

²⁰ Balang essa ay magtulos-tulos tu kalagayan na ti biyag nikuna dulawán siya nu Diyos.

²¹ Alipin ka beman nikuna dulawán ka nu Diyos? Dyan mo iye isipán. Pero ni tehhod ka a pagkakataun a makalaya ay gimitán mo iye.

²² U essa alipin tu itod a dinulaw nu Panginoon ay nagin malaya dán dipo tu Panginoon. Konna bi hod, u tolay a malaya nikuna dulawán ni Cristo ay nagin alipin dán ni Cristo.

²³ Binale kamon nu Diyos ti dakál a halaga; kaya dyan kamon paalipin tu tolay hide.

²⁴ Kaya kákkapatkákka ko hide, ánya man u kalagayan moy ti kákkabiyag nikuna dulawán kam nu Diyos, itod u itulos-tulos moy tu págserbi moy tu Diyos.

Tungkul tu Mámmadiket sakay tu Bilo hide a Bábbey

²⁵ Nadid, tungkul be tu mámmadiket sakay tu bábbelo hide, awanák ti mekagi a utus a gábwat tu Panginoon. Pero bilang essa a tolay a mapagkatiwalaan dipo tu kagbi nikán nu Panginoon ay iye u mekagi ko,

^26-27 Iye u makagi ko nikam nadid a panahun ni sákhirap. Ni tehhod ka dán a kabanga, ay dyan mo dán hiwalayan u kabanga mo. Ni awan ka palla ti kabanga ay mas maganda ni dyan ka dálla mákkabanga. Dipo tu palagay ko ay mas maganda pa a magtulos-tulos ka tu kalagayan mo ti biyag nikuna dulawán ka nu Diyos.

²⁸ Pero ni mákkabanga kam, ay awan kam magkasala. Sakay ni mákkabanga be u madiket ay awan siya magkasala. Pero u mákkabanga ay makadanas ti makpal a hirap ti biyagan iye, sakay ina a hirap u gusto ko a maiwasan moy.

²⁹ Iye u gusto ko a kagiyán, kákkapatkákka: adene dán u netakda a panahun, kaya sapul nadid, u tehhod a kabanga ay mabiyag a kumán a madiket.

³⁰ Dyan moy pabayan a u págluksa, págsaya, sakay pati be tu págbale ti ari-ariyan u magin dahilan nu káadág moy tu págserbi moy tu Diyos.

³¹ Sakay u mágpapospusán dálla tu bagay hide ti lutaáy ay ibali awan na dán. Dipo u atanan a katoy ti lutaáy ay mawan.

³² Gusto takam a meadeyo tu pakánbalisa. U pággaabalaan nu lállake a awan ti kabanga ay u gawain hide nu Panginoon sakay ni kodya siya a makasaya nikuna.

³³ Pero u pággaabalaan nu lállake a tehhod a kabanga ay u bagay hide ti munduwáy, dipo gusto na a mapasaya u kabanga na.

³⁴ Dipo he ay mahate u págserbi na. Konna labe hod tu mámmadiket sakay u bábbey hide a awan ti kabanga, u pakán abalaan de ay u bagay hide a patungkul tu Panginoon dipo gusto de a metalaga u buo de a biyag tu pagserbi tu Panginoon. Pero u bábbey a tehhod a kabanga ay u bagay ti lutaáy u pakán abalaan na, dipo gusto na a mapasaya u kabanga na.

³⁵ Kinagi ko iye tánni matulungan takam. Awan takam higpitan; u gusto kula ay meangay kam ti maayus a kákkabiyag, tánni awan kam maabala a magserbi tu Panginoon.

³⁶ Tungkul iye tu magkatipan a nagkasundu a awan palla pakasal, ni mabate nu lállake a masoh dán siya a mákduhog tu katipan na ay dapat dán hide a magpakasal. Itulos de u date de a plano. Pakasal dán hide, awan iye kasalanan.

³⁷ Pero ni magdisisyon u ulito a awan dán mákkabanga ay maganda iye ni matatag u kaluuban na sakay awan la siya napilitan. Sakay kaya na a magpugád tu sadile na.

³⁸ Kaya maganda mákkabangaáy, pero mas maganda ni makapagpugád tu sadile sakay awan mákkabanga.

³⁹ U bábbey ay tulos-tulos a mák-agum tu kabanga na mentaras biyag siya. Pero ni matay u lállake ay malaya dán siya a mákkabanga a huway maskin deya u kasohan na. Pero dapat ay tu kapareho na la be ti pánnampalataya.

⁴⁰ Pero palagay ko ay mas magin masaya siya ni awan dán siya mákkabanga a huway. Ina u makagi ko, sakay tukoy ko a he nikán u Ispirito nu Diyos.