1 Corinto 6 - U Maganda A Baheta Ni Jesu-Cristo

U Págreklamo kontara tu Kákkapatkákka tam

¹ Nadid, ni te essa nikam a tehhod a reklamo tu kapatkákka na bakin a iyangay napa tu awan manampalataya a huwes? Awan beman dapat iyangay na tu manampalataya hide ni Jesus?

² Awan moy beman tukoy a u pinile hide nu Diyos u mághatul ti munduway? Ni hikam u maghatul ti munduway, awan moy beman kaya a hatulan u konna hina ti kabadit a bagay?

³ Awan moy beman tukoy a hikitam u manghatul tu anghel hide? Kaya ni ánya u awan moy pamágkaintendiyan nadid dapat ayusán moy dipo badit la ina a bagay.

⁴ Kaya ni tehhod kam a reklamo, bakin a iyangay moy pa iye tu tolay hide a awan mánnampalataya?

⁵ Masanike kam be! Awan dán be malla nikam ti maare a mang-ayus tu problema moy a mátkaka?

⁶ Bakin a mamágkaso kam a mátkaka? Sakay u pángkasuwan moy pa ay u tolay hide a awan ti pánnampalataya.

⁷ U pángdimanda moy tu kapatkákka moy ay dakál a pagkakamali moy. Bakin awan moy dálla kaya a pasensiyaan u mággagimitán tu madukás sakay makán dayaán nikam?

⁸ Pero hikam pa a mismo u makán gimitán ti madukás sakay makán dayaán maskin tu kákkapatkákka moy hide ti pánnampalataya.

⁹ Awan moy beman tukoy a awan ti kabahagi tu kahariyan nu Diyos u makasalanan hide a tolay? Dyan moy dayaán u sadile moy! U tolay a mángngibábbey sakay mángngilállake, sumássamba tu diyos-diyosan, sakay mák-agum tu kaparehas na a lállake oni kaparehas na a bábbey,

¹⁰ u mágtakaw, u madadámmot, máglalasing, u mapagdusta sakay tu magdaya hide ay awan ti kabahagi tu kahariyan nu Diyos.

¹¹ Konna hina u agum nikam tu itod. Pero nalinis kamon tu kasalanan moy hide sakay netalaga kamon tu Diyos. Napatawad kamon tu ngahan nu Panginoon tam a ti Jesu-Cristo sakay tu Banal a Ispirito nu Diyos.

U Bággi Moy ay Templo nu Diyos

¹² Tehhod a magkagi hina a: “Maariyák a maggimet ti maski ánya.” Pero awan atanan a bagay ay makatulung nikam. Maari ko be a kagiyán, “Maariyák a maggimet ti maski ánya,” pero awanák magpaalipin tu ánya man a bagay.

¹³ U kagi be nu agum ay “U makan ay para tu tiyan, sakay u tiyan ay para tu makan.” Tama ina, pero pare-pareho ina a sidaáan nu Diyos. U bággi ay bakán a para tu pángngibábbey sakay pángngilállake nan para tu págserbi tu Panginoon, sakay u Panginoon u bahala a mangalaga tu bággi.

¹⁴ Sakay biniyag a huway nu Diyos u Panginoon a ti Jesus. Kaya hikitam be ay mabiyag a huway tu pamamag-itan nu kapangyariyan na.

¹⁵ Awan moy beman tukoy a parte kam nu bággi ni Cristo? Kaya ni hikán u bággi ko a kabahagi nu bággi ni Cristo ay talaga awan ko iduhog tu bággi nu belyas? Awan itod maare!

¹⁶ Awan moy beman tukoy a ni deya man u nákpággagum tu essa a belyas ay magin essa dán hide? Dipo kinagi na tu Kasulatan, “U duwwa ay magin essa.”

¹⁷ Pero u nákpagkaessa tu Panginoon, ay magin kaessa na ti Ispirito.

¹⁸ Kaya iwasan moy u pángngibábbey sakay pángngilállake. U agum a kasalanan a gággimitán nu tolay ay awan makasida tu bággi, pero u mangibábbey sakay mángilállake ay magkasala tu sadile na a bággi.

¹⁹ Awan moy beman tukoy a u bággi moy ay templo nu Banal a Ispirito a kátna nikam sakay tinanggap moy a gábwat tu Diyos? Kaya awan moy dán kao u bággi moy.

²⁰ Dipo natubus kamon ti dakál a halaga. Kaya gamitán moy u bággi moy para maparangalan u Diyos.