1 Corinto 4 - U Maganda A Baheta Ni Jesu-Cristo

U Apostol hide ni Cristo

¹ Nadid, dapat u pangileng moy nikame ay tagapagserbi ni Cristo sakay katiwala a mángpahayag tu upos nu Diyos a date a awan ti makatukoy.

² U katiwala ay kailangan a magin tapat tu amo na.

³ Pero awan ti ánya man nikán ni hatulanák moy oni maski hádya a pághukuman nu tolay; maski ni hikán a mismo ay awan ko maare a kagiyán a tapaták oni awan.

⁴ Awan ti mangbalisa ti isip kuwáy, pero bakán a u gusto na kagiyán ay awanák dán ti kasalanan. U Panginoon la u makahatul nikán ni tama oni male u gággimitán ko.

⁵ Kaya bakán a hikitam u magkagi ni tama oni madukás u essa a tolay. Maguhay kam tu tama a panahun, dipo u Panginoon u maghatul káddemát na. Iluwas na u bagay hide a netagu tu kadiklamman sakay ikagi na u lihim hide a plano nu balang essa. Ti panahunan iye, balang essa ay tumanggap ti papure a karapat-dapat nikuna a gábwat tu Diyos.

⁶ Kákkapatkákka hide, ginamit ko a halimbawa u sadile ko sakay ti Apolos para maintendiyan moy u gusto a kagiyán ni kakagiyanan iye, “Diyan moy dagdagen u nakasulat.” Kaya dyan moy ipagmadakál u essa a tolay sakay hamakán moy labe u essa.

⁷ Ánya i nanglamangan moyay tu agum? Awan beman atanan a katoy nikam ay gábwat tu Diyos? Ni konna hod, bakin a ipagmadakál moy ina a kumán a awan kaluub nikam nu Diyos?

⁸ U akala moy beman ay awan kamon ti pagkukulang sakay mágkayaman kamon! Hare kamon bál maske awan mikam tinulungan! Nakwa ay nagin hare kamon ngane tánni magin hari kame be a kaguman moy.

⁹ Dipo tu pangisip ko, hikame a apostol hide u ginimet nu Diyos a pinakamababa tu atanan a tolay. U kapareho me ay u tolay hide a nahatulan dán ti kákkatay, a áelingán nu anghel hide sakay nu tolay hide.

¹⁰ Kagi nu tolay hide, Awan kame kan ti tukoy dipo u itáttoldu me ay tungkul ni Cristo; pero mágkarunung kam kan dipo ni Cristo! Mágkahina kame kan; pero mágkabegsák kam kan! Sássestiyán kame pero igággalang kam!

¹¹ Hanggan ti iye a odas ay magaláp kame, mauwaw, sakay ngahe-ngahe a awan dán ti mesulot; páppasakitan sakay awan kame dálla ti matulu-tulusan.

¹² Magtarabaho kame para tehhod a makan. Idáddasal me a pagpalaán u magupos nikame ti madukás; táttiisán me ni sássestiyán di kame.

¹³ Ni mámmetmetán di kame ay tábbegán me hide tu makasaya hide a pággupos. Hanggan nadid ay kumán kame padi a madangát a sagad, a pinakamababa tu atanan a tolay ti munduwáy.

¹⁴ Awan ko iye insulat para ipasanike kam, nan para payuwan takam bilang anak ko hide a pinakamamahal.

¹⁵ Maskin magkahod kam ti sapulo a libo a tagapagtoldu tu kákkabiyag moy bilang Kristiyano, ay eessa padi u meturing a ama moy tu pánnampalataya. Hikán itod dipo hikán u nakasanigan moy tu Maganda a Baheta tungkul ni Cristo Jesus.

¹⁶ Kaya mákkekakagbiyák nikam a umaheg kam nikán.

¹⁷ Dipo he, kaya ko a pinaangay hina ti Timoteo, u pinakamamahal ko sakay tapat a anak tu Panginoon. Siya u mángpaala-ala nikam tu tama a kákkabiyag a sássunudán ko nadid a nákpagkaessaák dán ni Cristo Jesus. Ina hide u itáttoldu ko tu bawat mánnampalataya tu atanan a lugar.

¹⁸ U sangan nikam ay magmadakál dán dipo u akala de ay awanák dán hina angay.

¹⁹ Pero ni kaluuban nu Panginoon, ay angayák hina ti mas maaga, sakay ilingán ku pay ni ánya ipagmadakál diye, ni iye ay upos dila oni tatahoden a hod nide u kapangyariyan nu Diyos.

²⁰ Dipo u tolay a paghariyan nu Diyos ay ketan u kapangyariyan nu Diyos tu gimet na sakay bakán la a tu pággupos na.

²¹ Ánya u gusto moy: angayák hina a págngállan takam, oni angayák hina a ipeta u págmahal sakay kabaitan ko nikam?