1 Corinto 3 - U Maganda A Baheta Ni Jesu-Cristo

U Tagapagserbi hide nu Diyos

¹ Nadid, kákkapatkákka, awan takam makauhon konna tu gággimitán ko tu tolay hide a katoy nide u Banal a Ispirito. Kailangan a kauhunán takam bilang tolay a mabiyag palla ayun tu kagustuwan nu bággi, sakay anak palla ti pánnampalataya ni Cristo.

² U itoldu ko nikam ay nebagay tu bigu hide a mánnampalataya dipo awan moy palla kaya a maintendiyan u toldu hide a mangpabegsák tu pánnampalataya moy. Pero maski nadid ay awan moy palla kaya. Kumán a gatas u inyatád ko nikam, bakán a maigát a makan, dipo awan moy palla iye kaya.

³ Dipo maghare palla nikam u kagustuwan nu bággi. Tehhod palla a iyamutan sakay dimaan. Ina u mangpatunay a makamundu kam palla sakay mabiyag ayun tu kagustuwan nu bággi.

⁴ Ni kagiyán nu essa, “Sakupák ni Pablo,” sakay kagiyán be nu agum, “Sakupák ni Apolos,” awan beman ina u patunay a mabiyag kam palla ayun tu kagustuwan nu bággi?

⁵ Deya beman ti Apolos? Deyaák beman? Tagapagserbi kami la nu Diyos, ginamit nala tánni maakit kam a manalig ni Cristo. Gággimitán la nu balang essa u tarabaho a tinanggap na tu Panginoon.

⁶ Konna he u halimbawa nu tarabahu me, kumán a hikán u nagmula, ti Apolos u nagdilig, pero u Diyos u nagpatubu sakay nagpalagu.

⁷ Bakán a u nagmula oni u nagdilig u mahalaga, nan u Diyos a nangpatubu sakay nágpalagu.

⁸ U mágmula sakay u mágdilig ay pareho la a mágtarabaho sakay balang essa ay tumanggap ti gantimpala ayun tu pagud na.

⁹ Dipo pareho kami la ay ti Apolos a mágtarabaho para tu Diyos, sakay hikam u kumán a araduwan sakay hikam u kumán a bilay a ipataknág nu Diyos.

¹⁰ Ayun tu kabaitan nu Diyos nikán, hikán u nagdátton tu pundasyon, konna tu essa a malalake a mágpataknág. Sakay u agum be u mángtapos tu bilay. Pero magin maingat u balang essa a mángtapos tu bilay,

¹¹ dipo awan dán ti agum a pundasyon a maare a idátton maliban tu nedátton dán, awan ti agum nan ti Jesu-Cristo.

^12-13 Balang essa a mánnampalataya ay kailangan de a magin maingat dipo dumemát u aldew nu pághatul a atanan nu gimet de ay mapurbaan tu apoy. Ti aldiwan itod ay masubukan u ginimet nu balang essa ni te pinagserbiyan oni awan: U tolay a naggimet ti tama, kumán a intulos na u pággimet ti bilay a gimet ti ginto, pilak, sakay mágkahalaga a bito, dipo awan iye hide matutod. Pero u tolay a maggimet ti madukás ay kumán a intulos na u págtolnák ti bilay a gimet ti kayo, lamon, oni yaut a matutod.

¹⁴ Ni awan natutod u netaknág tu dibbew nu pundasyon ay makatanggap ti gantimpala u nángpataknág hod.

¹⁵ Pero ni matutod iye ay awan siya ti matanggap a gantimpala; pero maligtas padi siya. Kaya la ay kumán la siya a nakaligtas tu apoy.

¹⁶ Awan moy beman tukoy a templo kam nu Diyos dipo mágyan nikam u Ispirito na?

¹⁷ Ni ti deya man u mangsida tu templo nu Diyos ay parusaan na. Dipo banal u templo nu Diyos, hikam i templo wan ina.

¹⁸ Dyan moy dayaán u sadile moy. Ni tehhod a magakala nikam a malalake siya ayun tu karunungan ni munduwáy ay dapat ibilang na dán u sadile na a awan ti tukoy tánni matukuyan na u karunungan a gábwat tu Diyos.

¹⁹ Dipo u karunungan ti munduwan iye ay awan ti kabuluhan tu pangileng nu Diyos. Konna he u nakasulat tu Kasulatan, “Ekhutan nu Diyos u mágkalalake hide tu kalalakiyan di labe.”

²⁰ Sakay kinagi na pa tu Kasulatan, “Tukoy nu Panginoon a awan ti kabuluhan u áisipán nu tolay hide a magakala a mágkalalake hide.”

²¹ Kaya dyan moy ipagmadakál u deya man. Dipo mebilang a hod nikam u atanan:

²² hikán a ti Pablo, Apolos, sakay ti Pedro ay inyatád na para nikam. I munduway, u biyag, u kákkatay, sakay u panahun nadid sakay tu dumemát a panahun, iye a atanan ay neatád nikam para tu kapiyaan moy.

²³ Sakay hikam ay para ni Cristo, sakay ti Cristo ay para tu Diyos.