1 Corinto 16 - U Maganda A Baheta Ni Jesu-Cristo

U Tulung tu Kákkapatkákka hide ti Judea

¹ Nadid ay tungkul be tu tulung a naipun moy para tu kákkapatkákka hide ti Judea, gimitán moy u konna tu kinagi ko tu mánnampalataya hide ti Galacia.

² Kada dipalongo a aldew nu sasimba ay mangsáddi dán u balang essa ayun tu kitaán na, sakay ipunán itod para awan dán kailangan a magaged ti tulung káddemát ko hina.

³ Káddemát ko hina ay paangayán ko ti Jerusalem u tolay hide a napili moy a mangtawed tu tulung moy sakay manggimiták be ti sulat para ipakilala hide tu mánnampalataya hide ti Jerusalem.

⁴ Pero ni kailangan a umangayák be ti Jerusalem ikuyog ko dálla hide.

U Plano hide ni Pablo

⁵ Bumisitaák hina kággábwat ko ti Macedonia, dipo kailangan ko a humoyot hod.

⁶ Bakay magmalayák hina sakay hedák dán hina a magpalipas ti amiyan tán matulunganák moy tu pangangailangan ko tu sumunud ko a páglakbay ni hádya man itod.

⁷ Dipo umád ko a basta la a humoyot hina; nan gusto ko nakwa a magmalay hina ni kaluuban nu Panginoon.

⁸ Pero plano ko a mágyan he ti Efeso wáy hanggan tu Pentecostes.

⁹ Dipo makpál he a pagkakataun para tu págserbi tam, maski makpal u kumontara nikán.

¹⁰ Káddemát hina ni Timoteo ay tanggapán moy siya ti maganda tánni mapayapa u kaluuban na, dipo kapareho ko siya a tagapagserbi nu Panginoon.

¹¹ Dyan moy siya imemenos. Nan tu kállakad na ay tulungan moy siya tu kailangan na hide tánni makasole he siya nikán a tehhod a kapayapaan. Dipo áuhayán ko siya sakay tu kákkapatkákka tam hide.

¹² Tungkul be tu kapatkákka tam a ti Apolos mahigpit ko siya a pinákpágguhunan a bumisita hina, kaguman nu kákkapatkákka hide, pero awan kan palla siya hina makaangay nadid. Pero ni tehhod kan a pagkakataun ay bumisita siya hina.

Pangkatapusan a Pággupos

¹³ Magin handa kam sakay magpakatatag tu pánnampalataya moy. Magpakatapang kam sakay magpakatibay.

¹⁴ Anya man u gimitán moy ay dapat gimitán moy a tehhod a págmahal.

¹⁵ Nadid, kákkapatkákka ko hide, tukoy moy a u pamilya ni Estefanas u kadipalonguwan a Kristiyano ti Acaya; sakay inlaan de u sadile de tu págserbi tu pinile hide nu Diyos. Ipákpágguhon ko nikam,

¹⁶ a pasakup kam tu konna nide sakay tu deya man a tumáttulung tu tagapagserbi hide nu Panginoon.

¹⁷ Masayaák a tahod tu káddemát di Estefanas, Fortunato, sakay ti Acaico. Maammawák nikam a atanan pero nabawasan ti badit dipo katoy he hide dakál u tulung de nikán.

¹⁸ Hide u nangpasaya nikán, sakay konna be nikam. Pahalagaan moy u konna hina hide a tolay.

¹⁹ Kumustaán kam nu mánnampalataya hide ti Asia. Kumustaán kam be tu ngahan nu Panginoon di Aquila sakay Priscila sakay u kákkapatkákka hide a mamággipun-ipun tu bilay de.

²⁰ Sakay kumusta kam be kagi nu atanan a kákkapatkákka he. Magkumustaan kam bilang mátkaka ni Cristo.

²¹ Hikán a ti Pablo u nagsulat ti iye a pángngumusta.

²² Parusaan nakwa nu Panginoon u awan magmahal nikuna! Dumemát ka dán nakwan, Panginoon me!

²³ Pagpalaán kam nakwa nu Panginoon a ti Jesus.

²⁴ Mahal takam a atanan bilang kákkapatkákka ko ni Cristo Jesus. Amen.