1 Corinto 15 - U Maganda A Baheta Ni Jesu-Cristo

U Kákkabiyag a Huway ni Cristo

¹ Nadid, gusto ko a ipaalaala nikam, kákkapatkákka ko hide, u Maganda a Baheta a impangaral ko nikam. Ina u upos nu Diyos a tinanggap moy, sakay nagin pundasyon nu pánnampalataya moy.

² Tu pamamag-itan ni iye ay naligtas kam, ni masibát kam a maniwala tu upos a impangaral ko nikam, maliban dálla ni awan talaga tunay u kássampalataya moy.

³ Dipo impangaral ko nikam i tunayáy a halaga a adal a tinanggap ko labe. Siya iye: natay ti Cristo dipo tu kasalanan tam hide, tánni matupad u nakasulat tu Kasulatan.

⁴ Nelábbang siya sakay nabiyag a huway tu katállo a aldew, sigun be tu Kasulatan.

⁵ Sakay pummeta siya ni Pedro, sakay tu sapulo ay ti duwwa a apostol.

⁶ Káttapos ay pummeta siya tu mahigit a limma a datos a kákkapatkákka a namággipun-ipun. Makpal palla u biyag nide hanggan nadid, pero nágkatay dán u agum.

⁷ Pummeta be siya ni Santiago sakay tu atanan a apostol hide.

⁸ U kadimodyanan ay nikuna pummeta siya nikán. Kumánnák a neenak tu awan tama a panahun dipo awanák nakaguman ni Jesus pero nagin apostolák napade maski konnaák tu essa a anak a neenak tu awan tama a panahun.

⁹ Dipo hikán u pinakamababa tu atanan a apostol; awanák karapat-dapat a madulawan a apostol, dipo pináppahirapan ko u mánnampalataya hide.

¹⁰ Pero dipo tu kagbi nu Diyos nikán ay nagin apostolák, sakay awan be nawanan ti kabuluhan u kaluub a iye nikán. Nagtrabahuwák ti husto kasera tu agum nide, pero bakán iye tu sadile ko a kakayanan nan tu kabaitan la nu Diyos nikán.

¹¹ Kaya maski hikán oni hide, iye u ipáppangaral me, sakay sa iye u paniwalaan moy.

U kákkabiyag a Huway nu Nágkatay hide

¹² Nadid, ni ipáppangaral me nikam a nabiyag a huway ti Cristo, bakin a kákkagiyán nu agum nikam a awan mabiyag a huway u nágkatay hide?

¹³ Pero ni tatahoden a awan ti mabiyag a huway, ay u gusto na a kagiyán ay awan labe nabiyag a huway ti Cristo.

¹⁴ Ni awan nabiyag a huway ti Cristo ay awan ti kabuluhan u pángngaral me sakay awan kambe ti pakinabang tu pánnampalataya moy.

¹⁵ Bakán la a ina. Ni mara tatahoden u kákkagiyán moy a awan biyagán a huway nu Diyos u patay hide, u gustu na a kagiyán, awan nabe biniyag a huway ti Cristo. Ni konna hod, mágkabule kame a tistigu nu Diyos dipo itáttoldu me a biniyag nu Diyos a huway ti Cristo.

¹⁶ Dipo ni awan nabiyag a huway u nágkatay hide ay awan be nabiniyag a huway ti Cristo.

¹⁷ Ni awan nabiyag a huway ti Cristo, ay awan kam ti pakinabang tu pánnampalataya moy sakay awan kam pade napatawad tu kasalanan moy hide.

¹⁸ Sakay bakán la ina, u gusto na a kagiyán atanan nu nágkatay dán hide a naniwala ni Cristo ay nepahamak.

¹⁹ Ni u pag-asa tam ni Cristo ay para la ti biyagáy a iye, ay hikitamon u pinakakakagbi tu atanan a tolay.

²⁰ Pero u tatahoden ay nabiyag a huway ti Cristo bilang katunayan a biyagán na a huway u nágkatay dán hide.

²¹ Ni kodya a dummemát u kákkatay tu pamamag-itan nu essa tolay ay konna labe hod, dumemát be u kákkabiyag a huway tu pamamag-itan nu essa a tolay.

²² Dipo ni kodya a matay u atanan dipo hide ay lahe ni Adan, ay mabiyag be u atanan dipo tu pákpágkaessa de ni Cristo.

²³ Pero u kákkabiyag a huway nu balang essa ay tehhod a netakda a panahun: u kadipalonguwan a nabiyag a huway ay ti Cristo; sakay tu kássole na he ti munduway ay u mánnampalataya dámman hide u biyagán na a huway.

²⁴ Káttapos ni itod dumemát u katapusan. Sakay káttapos a matalo ni Cristo u atanan nu kaharian, pamahalaan sakay kapangyariyan ay iyatád na tu Diyos a Ama u pághare tu atanan.

²⁵ Dipo ti Cristo ay dapat a maghare hanggan matalo na sakay mapasuko na u atanan a kadima na.

²⁶ U kadimodyanan a kadima a taluwán na ay u kamatayan.

²⁷ Dipo kinagi nu Kasulatan: “U atanan a bagay ay impasakup nikuna nu Diyos.” (Pero u upos a, “atanan a bagay,” ay maliwanag a awan he kaguman u Diyos a nángdátton tu atanan a bagay tu sakup nu kapangyariyan ni Cristo.)

²⁸ Ni nasakup dán nu kapangyariyan ni Cristo u atanan a bagay, u Anak dámman be u pasakup tu kapangyariyan nu Diyos a nángdátton tu atanan a bagay a nasakupan nu kapangyariyan nu Anak. Tu konna hod ay maghare u Diyos tu atanan.

²⁹ Nadid, te kaugaliyan u agum a tolay a magpabawtismo hide alang-alang tu nágkatay hide. Pero ni awan hide maniwala a huway a biyagán u nágkatay hide, bakin dipa a gimitán i kaugaliyan diyan itod?

³⁰ Sakay hikame, bakin mi pa a itaya u biyag me tu dilikadu a kalagayan kada odas?

³¹ Awan ti odas a awanák katoy tu dilikadu a kalagayan, kákkapatkákka! Ni kodya a tatahoden a ipágmadakál takam dipo tu pákpagkaessa tam ni Cristo Jesus a Panginoon tam, tatahoden be i kagiyán kuwan iye!

³² Ni u pákpáglaban ko tu mágkatapang a kadima he ti Efesowáy ay para la tu tolay, anya pakinabang kuway? Ni awan be mabiyag a huway u nágkatay hide, maganda pa ni sunudán tam i kakagiyánán iye: “Kuman kitam sakay uminom, dipo ni ilaw ay matay kitamon.”

³³ Dyan kam padaya, dipo “U madukás a kaguman ay makasida ti mágkaganda a ugale.”

³⁴ Magpakatino kam sakay adággen moy dán u kasalanan. U agum nikam ay liwat u pákkatukoy na tu Diyos; kagiyán ko iye tánni mepasanike kam.

U magin Idsura nu Bággi ni Mabiyag a huway

³⁵ Pero ni te magtanung, “Kodya a mabiyag a huway u nágkatay dán hide? Ánya u magin idsura nu bággi de?”

³⁶ Awan ti tukoy u magtanung ti konna hina! Awan mabiyag u bine a nemula ni awan iye matay.

³⁷ Sakay ni magmula kam ti trigu sakay tu agum pa a bine, u imula moy ay u bukál la, bakán a u dakál dán a mula.

³⁸ U Diyos u mangatád tu bággi nu bine, ayun tu kaluuban na; bawat bine ay átádden na ti tama a bággi.

³⁹ Konna bihod tu bággi; awan pare-pareho u bággi nu nilalang hide a tehhod a biyag; iba u bággi nu tolay, iba u bággi nu hayup, iba tu manok hide, sakay iba be tu ikan hide.

⁴⁰ Te bággi a panglanget sakay tehhod be a pangluta; iba u ganda nu pangluta a bággi sakay iba be u ganda nu panglanget.

⁴¹ Iba u demlag nu aldew, iba be u demlag nu bulan, sakay iba be u demlag nu biton hide. Sakay maski u biton hide ay tehhod a iba-iba a demlag.

⁴² Konna labe hina tu kákkabiyag a huway. U melábbang a bággi ay mahunot, pero awan mahuno-hunot maski nikan u bággi a biniyag a huway.

⁴³ Madukás sakay awan ti kaya u baggi a nelábbang, pero ni biyagan dán iye a huway ay maganda sakay mabegsák dán.

⁴⁴ U bággi a nelábbáng ay pangluta, pero ni biyagán dán a huway ay bággi dán a panglanget. Dipo ni tehhod a bággi a pangluta tehhod be a bággi a panglanget.

⁴⁵ Konna he u nakasulat tu Kasulatan, “U kadipalonguwan a tolay a inatádden ti biyag ay ti Adan.” Pero u kadimodyanan a Adan ay ti Cristo a Ispirito a mángngatád ti biyag.

⁴⁶ Pero u dipalongo a inyatád nu Diyos nikitam ay u bággi tam a pangluta pero káttapos ni iye ay palitan na iye ti bággi a panglanget.

⁴⁷ U kadipalonguwan a tolay ay gábwat tu luta, pero u kaduwwa a tolay ay gábwat ti langet.

⁴⁸ Atanan a tolay ti muduwáy u bággi de ay konna tu bággi ni Adan a naggábwat tu luta. Pero u katoy ni Cristo ay magin kapareho nu bággi ni Cristo a gábwat ti langet.

⁴⁹ Ni kodya kitam a kapareho nu tolay a naggábwat tu luta ay dumemát u aldew a u bággi tam ay pumareho ni Cristo a naggábwat ti langet.

⁵⁰ Iye u gusto ko a kagiyán, kákkapatkákka ko hide: u bággi tam a nabuo nu pilas sakay dige ay awan magkahod ti bahagi tu kahariyan nu Diyos. U bággi a iye a mahunot ay awan maare a makatanggap ti biyag a awan ti kahád.

⁵¹ Mágsaneg kam ta te kagiyánnák a lihim nikam: bakán a atanan ay matay, pero mabagu kitam a atanan,

⁵² ti essa a kisáp ni mata, kasabay nu dimodyan a tánnog nu trumpeta. Káttánnog nu trumpeta, u nágkatay dán hide ay mabiyag a huway sakay awan dán matay. Sakay mabagu kitam a atanan.

⁵³ Dipo i bággiyan iye a mahunot ay mapalitan ti awan mahunot sakay u bággi a matay ay mapalitan ti awan mata-matay.

⁵⁴ Ni mapalitan dán ti awan mahunot u bággi sakay mapalitan dán ti awan matay u bággi ay matupad u kinagi na tu Kasulatan: “Natalo dán u kamatayan; ganap dán u tagumpay!”

⁵⁵ “Awan dán ti tagumpay, U kamatayan sakay awan dán siya ti kapangyariyan.”

⁵⁶ U kamandag nu kákkatay ay u kasalanan, sakay u kapangyariyan nu kasalanan ay naggábwat tu Kautusan.

⁵⁷ Pero magpasalamat kitam tu Diyos ta inatádden na kitam ti tagumpay tu pamamag-itan nu Panginoon tam a ti Jesu-Cristo!

⁵⁸ Kaya ngane, mahal ko hide a kákkapatkákka, magpakatatag kam sakay dyan manghina. Magpakasipag kam tu págserbi tu Panginoon dipo tukoy moy a awan masayang u pagud moy para nikuna.