1 Corinto 12 - U Maganda A Baheta Ni Jesu-Cristo

U Kaluub hide nu Banal a Ispirito

¹ Nadid, kákkapatkákka, u ipaliwanag ko nikam ay tungkul tu kaluub hide nu Banal a Ispirito. Gusto ko a malinaw iye hide a bagay nikam.

² Tu itod, nikuna awan kam palla mánnampalataya, ay netaw-taw kam tu pánniwala moy tu diyos-diyosan hide a awan be makapagupos.

³ Kaya gusto ko a matukuyan moy a maski nikan ay awan makagi nu tolay a igággiya nu Ispirito nu Diyos a, “Sumpaán ti Jesus!” Sakay awan be makagi nu maskin deya a, “Panginoon ti Jesus,” ni awan siya igiya nu Banal a Ispirito.

⁴ Nadid, tehhod kitam a iba-iba a kaluub, pero eessa la u Ispirito a mágkaluub ti iye.

⁵ Sakay tehhod be a iba-iba a kalase ni págserbi, pero eessa la a Panginoon u pagserbiyan tam.

⁶ Sakay tehhod be a iba-iba u ipagimet u Diyos tu balang essa nikitam pero u Diyos labe u nángkaluub tu kakayanan para gimitán iye hide.

⁷ Inatádden nu Banal a Ispirito u balang essa nikitam ti sadile tam a kaluub, tánni magserbi kitam tu kaguman tam hide para tu kapiyaan de.

⁸ U agum nikitam ay inatádden nu Banal a Ispirito ti kakayanan a mángbaheta tu upos nu Diyos a nebagay tu kailangan nu mánnampalataya hide. U agum be ay u kakayanan a ipaliwanag u karunungan nu Diyos, pero i iye hide ay naggábwat be tu Banal a Ispirito.

⁹ Iye labe a Ispirito u nángkaluub tu agum ti dakál a pánnampalataya tu Diyos, sakay u agum ay tehhod a kapangyariyan a magpapiyya tu te saket hide.

¹⁰ Tehhod a pinagkaluuben ti kapangyariyan a makagimet ti makataka-taka a bagay; sakay u agum be ay pinagkaluuban ti kakayanan a magin prupeta. Tehhod be a pinagkaluuben ti kakayanan a makatukoy ni u kapangyariyan nu tolay ay gábwat tu Banal a Ispirito oni tu mágkadukás hide a ispirito. U agum be ay tehhod a kakayanan a makapagupos ti iba-iba a upos, sakay u agum ay u kakayanan a makapángpaliwanag ti upussan itod hide.

¹¹ Eessa la a Ispirito u náng-atád ti iye a atanan, sakay ibahagi na iye tu balang essa ayun tu kagustuwan na.

Essa a Bággi Pero Makpal a Parte

¹² U bággi ay eessa pero makpal a parte; maski ni binuo nu iba-iba a parte, ay eessa pade iye a bággi konna bihod ti Cristo; makpal u mánnampalataya nikuna pero eessa la ti Cristo a nákpagkaessaan de.

¹³ Dipo atanan tam, maskin Judio oni ni Griego, alipin man oni malaya, ay nabawtismuwan tu eessa a Ispirito tánni magin essa a bággi. Sakay atanan tam ay nakatanggap tu eessa a Ispirito.

¹⁴ U bággi ay binuo nu makpal a parte, bakán la a eessa a parte.

¹⁵ Mara ni kagiyán nu tikád, “Bakánnák a kamát, kaya awanák parte nu bággi,” awan dán beman iye parte nu bággi?

¹⁶ Sakay mara ni kagiyán nu talinga, “Bakánnák a mata, kaya awanák parte nu bággi,” awan dán beman iye parte nu bággi?

¹⁷ Ni puro mata u buo a bággi, kodya wád iye a makasaneg? Ni puro be a talinga u buo a bággi, kodya wád iye a makaahob?

¹⁸ Kaya ngane, ayun tu kagustuwan nu Diyos, indátton na u bawat parte nu bággi tam ayun tu tama a kegamitan nu bawat parte.

¹⁹ Ni eessa la iye a parte, ay awan iye makagi a baggi.

²⁰ U tatahoden ay mákpal a parte, pero nabuo iye ti essa la a bággi.

²¹ Kaya awan makagi nu mata tu kamát, “Awan taka kailangan,” kumonna be tu ulo, tu tikád, “Awan taka kailangan.”

²² Ni tuusán, u parte hide a kumán a mágkahina ay sa itod pa u mas kailangan.

²³ Sakay u parte hide nu bággi, a tu pangileng tam ay awan masiyadu a mahalaga ay alagaan tam ti husto. Sakay u parte nu baggi a awan maganda ay pagandaán tam ti husto.

²⁴ Awan tamon pagandaan u parte hide a mágkaganda dán. Konna hod u ginimet nu Diyos tu baggi tam, tánni maalagaan tam u parte hide a tu palagay tam ay awan masiyadu a mahalaga u gamit de.

²⁵ Konna hod u ginimet nu Diyos tánni magkaessa a mamágtulung u bawat parte nu bággi, sakay mamágmalasakitan hide.

²⁶ Ni masakitan u essa a parte, ay masakitan be u atanan a bággi. Ni maparangalan u essa a parte, ay masaya hide a atanan.

²⁷ Nadid, hikam u bággi ni Cristo. Sakay u bawat essa ay parte nu bággi na.

²⁸ Sakay nángdatton u Diyos tu mánnampalataya hide ti kaluub. U dipalongo ay u apostol hide; u kaduwwa ay u propeta hide, sakay u katallo ay u tagapagtoldu hide tu upos nu Diyos. Nángdátton be siya ti tolay a makagimet ti makataka-taka, makapagpapiyya tu te saket, te tagatulong, te taga pangasiwa, sakay tehhod be a makapagupos ti iba-iba a upos.

²⁹ Awan atanan ay apostol, propeta, oni tagapagtoldu tu upos nu Diyos. Sakay awan be atanan ay makagimet ti makataka-taka a bagay.

³⁰ Awan be atanan ay makapagpapiyya tu tehhod hide a saket sakay makapagupos ti iba-iba a upos sakay awan be atanan ay makapagpaliwanag tu gusto a kagiyán ni itod hide a upos.

³¹ Pero sikapán moy a magkahod ti kaluub a makatulung tu kapiyaan nu kákkapatkákka tam ti pánnampalataya. Sakay nadid ay itoldu ko nikam u pinakamaganda ti atanan.