1 Corinto 11 - U Maganda A Baheta Ni Jesu-Cristo

¹ Nadid, ahigánnák moy a konna tu páng-aheg ko ni Cristo.

U Alibonbun ni Magdasal

² Ipagmadakál takam, dipo pirmiyák moy a maala-ala tu atanan a bagay sakay sássunudán moy u intáttoldu ko nikam.

³ Pero gusto ko a maintendiyan moy a sakup ni Cristo u bawat lállake sakay u lállake u te sakup tu kabanga na sakay u Diyos u te sakup ni Cristo.

⁴ U lállake a magdasal oni magpahayag tu upos nu Diyos a tehhod a alibonbun ay awan ti galang ni Cristo a nakasakup nikuna.

⁵ Sakay u bábbey a magdasal oni magpahayag tu upos nu Diyos a awan ti alibonbun ay awan ti galang tu kabanga na sakay kumán siya a polpok.

⁶ Pero ni umád nu bábbey a mággalibonbun ay dapat magpapolpok dálla siya. Pero makasani-sanike tu bábbey ni papolpok oni pagapas, kaya mas maganda ni mággalibonbun dálla siya.

⁷ Pero u lállake ay dapat awan mággalibonbun dipo he nikuna a ketan u idsura sakay karangalan nu Diyos. Pero u bábbey ay karangalan nu lállake.

⁸ Dipo awan gábwat tu dipalongo a bábbey u lállake nan u dipalongo a bábbey u gábwat tu lállake.

⁹ Awan be nilalang u lállake para tu bábbey nan u bábbey u para tu lállake.

¹⁰ Kaya ngane, dapat a mággalibonbun u bábbey tánni ketan maski nu anghel hide a nagpasakup siya tu kabanga na.

¹¹ Pero hikitam a manampalataya hide ni Cristo lállake man oni bábbey ay pareho hide a mahalaga. Kaya diyan kagiyán nu bábbey a awan na kailangan u lállake sakay diyan be kagiyán nu lállake a awan na kailangan u bábbey.

¹² Ni naggábwat man u bábbey tu lállake, u lállake be ay iyáenak nu bábbey; sakay u atanan ay naggábwat tu Diyos.

¹³ Hikamon u magdisisyon: maganda beman a áelingan u essa a bábbey ni magdasal a awan ti alibonbun?

¹⁴ Awan beman date moy dán a tukoy a makasani-sanike para tu essa a lállake ni atakdug u buuk na?

¹⁵ Pero karangalan nu bábbey ni tehhod siya a atakdug a buuk. Dipo nepagkaluub iye nikuna bilang alibonbun na.

¹⁶ Pero ni tehhod pa a masoh a mákpag-tábbegan tungkul ti iye hide, ay iye u makagi ko: awan kami dán ti iba a kaugaliyan tu págsamba nan sakay iye be u kaugaliyan nu agum pa a mánnampalataya hide tu Diyos.

U Banal a Pangapon

¹⁷ Pero ti sunud kuwáy a kagiyán, ay awan takam mepagmadakál: dipo u pamággipun-ipun moy ay awan ti neatád a maganda nan mas lalo pa a nedukás.

¹⁸ Dipo nabaheta ko a tu pamagipun-ipun moy ay awan kam ti pamágkaessa. Sakay maniwalaák a tatahoden iye.

¹⁹ (Talaga a magguru-gurupo kam! Pero kaluuban dámbe nu Diyos ina tánni ketan nitideya nikam u matapat?)

²⁰ Tu pamággipun-ipun moy, para tu Banal a Pangapon ay awan tama u gággimitán mo u kanán moy.

²¹ Dipo u balang essa kan nikam ay magapura dán a kuman tu bilon na, kaya magaláp dán u agum sakay nalasing dán be u agum.

²² Awan kam beman ti sadile a bilay tánni hod kam a kuman sakay uminom? Oni imemenos moy u mánnampalataya hide sakay pasanikiyán u mágkahirap hide a awan ti matawed a makan? Ánya nadid gimitán kuway? Ahakán takam? Awan! Awan takam maahak!

²³ Iye u adal a natanggap ko tu Panginoon sakay ibahagi ko labe iye nikam: tu gibi a nángtokyon de tu Panginoon Jesus ay nangalap siya ti tinapay.

²⁴ Sakay káttapos na a nagpasalamat, ay hinate-hate na itod, sakay kinagi na, “Iye u bággi ko a mealay para nikam. Gimitán moy iye bilang pággala-ala moy nikán.”

²⁵ Konna labi hod, káttapos de a nangapon ay tinawiden na u baso sakay kinagi na, “Iye u baso nu bigu a kasunduwan a pinatunayan nu dige ko. Kada inumán moy iye, ay gimitán moy bilang pággala-ala moy nikán.”

²⁶ Dipo kada mamággipun-ipun kam para kuman ti tinapay sakay uminom tu baso ay ipakapos-pos moy tu tolay hide u kákkatay nu Panginoon, hanggan tu kássole na a huway.

²⁷ Kaya ni deya man u kuman tu tinapay sakay uminom tu baso nu Panginoon a awan karapat-dapat ay nagkasala hide tu Panginoon Jesus a siya u náng-alay tu bággi na sakay tu digi na.

²⁸ Kaya pakasuriyán nu tolay u sadile na bagu a kuman tu tinapay sakay uminom tu baso.

²⁹ Dipo ni deya man u kuman sakay uminom a awan na áisipán u kahalagaan nu bággi nu Panginoon Jesus, ay kumán a kimman sakay umminom tu hatul para tu sadile na.

³⁰ Kaya sa iye u dahilan ni bakin a mágkahina sakay masasaktin u kakpalan nikam, sakay u agum pa nikam ay nágkatay dán.

³¹ Pero ni pakasuriyan tam u sadile tam, ay awan kitam hatulan nu Panginoon.

³² Pero ni ipakultad nu Panginoon a parusaan na kitam, itod ay para tolduwan na kitam tánni awan kitam mekuyog tu bakán hide a mánnampalataya a parusaan nu Panginoon.

³³ Kaya ngane, kákkapatkákka ko hide, kapag magipun-ipun kam a kuman ay mamágguhayan kam.

³⁴ Ni tehhod nikam a magaláp, ay kuman pala tu bilay de tánni awan umabut ti hatul a kaparusaan u pamággipun-ipun moy. Tungkul be tu agum pa hide a bagay, ay saka ko dálla ayusán káddemát ko hina.