Zekaria 5 - KITABU KITAKATIFU

¹ Ma kandi nda ginga tsimoni tsyange, nokulola, henza, kya lingwa kuli lududu kyokubuluka.

² Naye ya nteva, U lola ki? Nda mu tivulira, Ndola kya lingwa kuli lududu kyokubuluka; butambi bwakyo ligera lya makono makumi gaviri, nobugalamu bwakyo ligera lya makono likumi.

³ Ma ya mbolera, Yili ni lilaama li twulanga kutsia mu mmoni mwekivala kyosi: kigira ku vosi wivanga a la twulidzwa ku luvega lulala kuli kyokulingwa yiki; noku vosi mundu wesuhanga a la twulidzwa ku luvega lundi kuli kyokulingwa yiki.

⁴ Nda ki leta, Yahova wa mahe a vola, na ki lingira mu inyumba yomwivi, nomu inyumba ya uyu wisuhanga ku lieta lyange nobubehi; na ki la menya hagati ha inyumba yeye, nokugisamba halala nemisala gyayo na magina gayo.

⁵ Hene yaho ingelosi wa volerana ninze ya twula, nokumbolera, Ginga tsimoni tsitsyo kalunu, u lole ni kindu ki ki twulanga.

⁶ Na nda teva, Ni kindu ki? Naye ya vola, Yiki ki veye efa i twulanga. Na kandi ya vola, Yili ni liloleka lyavo mu kivala kyosi

⁷ (kandi, henza, italenta indala yelisasi i gingangwa igulu); na uyu a veye mukali wikalanga hagati ha efa.

⁸ Naye a vola, Uyu a veye Ubudamano: na ya mu sigisa hasi hagati ha efa; na ya sigisa ubuliduhu bwelisasi ku munwa gwa efa.

⁹ Ma nda ginga tsimoni tsyange, ni ndola, henza, avakali vaviri va twula, nembuudza ya li mu tsimbaha tsyavo; navo va li ne tsimbaha kuli tsimbaha tsyeligungu, na va ginga efa igulu hagati helirova neligulu.

¹⁰ Hene yaho nda volera ingelosi wa volerana ninze, Yavo va tsitsa haliha na efa?

¹¹ Naye ya mbolera, Va tsitsanga ku mwombakira inyumba mu kivala kya Shinaru: na lwa i mali kulombwa a la menya yo ha bugono bwibwe mwene.