Zekaria 4 - KITABU KITAKATIFU

¹ Na ingelosi wa volerana ninze yadza ku inze hali kaviri, nokumbukidza, kuli mundu u vukidzangwa mu tsindolo tsitsye.

² Naye ya nteva, U lola ki? Na nda vola, Ndoli, henza, kinara kyetaya, kyosi kyethahabu, halala na ludavo ku isonga yakyo, na tsitaya tsitano na tsiviri kukyo; na tsitaya tsya li ne vidundu vitano na viviri vyokule ta maguta, vya li kukyo;

³ na misala gyiviri gyemizeituni gya li ho ahimbi kukyo, mulala ku luvega lwomukono mulungi gwakyo, na gundi ku luvega lwomukono mmosi gwakyo

⁴ Nda tivula nokuteva ingelosi wa volerana ninze, ni mbola, Munene wange, vindu yivi vi veye ki?

⁵ Hene yaho ingelosi wa volirana ninze ya ntivulira nokumbolera, Ive si u manya vindu yivi vi veye ki? Inze nda vola, Auwa, munene wange.

⁶ Ma ya ntivulira, nokumbolera, na a vola, Yili ni likuva lya Yahova ku Zerubabeli, kuvola, Si ga veye kigira ubunyali, kinga kigira tsingulu, navutswa ga veye kigira Roho wange, Yahova wa mahe a vola.

⁷ Ive ni bwaha, O kigulu kinene? Imbiri wa Zerubabeli u la gwa kivala kyekereremu; naye a la leta ligina lyokugulira halala no kukupa isango, kuvola, Tsimbabasi, tsimbabasi, tsi ve kulyo.

⁸ Kandi likuva lya Yahova lya duka ku inze, kuvola,

⁹ Makono ga Zerubabeli ga mali kutema muse gyenyumba yiyi, makono gege gene yago ga la gi mala; na ive u la manya ni Yahova wa mahe wa ntuma inze ku mwinye.

¹⁰ Kigira ni bwaha u legi lidiku lyevindu vikekeke? Kigira va la sangala, na va la lola Zerubabeli na a veye neplum mmukono gwigwe; yivi vitano na viviri vi veye tsimoni tsya Yahova, tsi lola yiyi na yiyi mu lirova lyosi.

¹¹ Hene yaho nda tivula, nokumuvolera, Misala gyiviri gyemizeituni gyi veye ku luvega lwomukono mulungi gwekinara kyetsitaya, nokumukono mmosi, gyi veye ki?

¹² Na nda tivula hali kaviri, nokumuteva, tsisya tsiviri yitsi tsyemizeituni tsi veye himbi ha vidundu viviri vyetha habu, vi hilanga maguta gethahabu, tsi veye ki?

¹³ Naye ya ntivulira na a vola, Si u manya ni vindu ki yivi? Na inze nda vola, Auwa, munene wange, si mmanya mba.

¹⁴ Ma ya mbolera, Yava va veye vaviri avavakwa a maguta, avasingira ahimbi na Yahova welirova lyosi.