Zekaria 14 - KITABU KITAKATIFU

¹ Henza, lidiku lya Yahova lidzanga, lwa vilanye vivyo vi li gavulwa hagati hoho.

² Kigira nda vungidza tsihiri tsyosi ku Yerusalemi kulwana; na lidala li la vugulwa na tsinyumba tsyalyo tsi la fuulwa na vakali va lononnywa; na lidala ku luvega lulala li la tsia mbutugwa, na avandu va tigala si va la twulidzwa mu lidala mba.

³ Hene yaho Yahova a la twula, nokulwana netsihiri zana kuli lwa ya lwana mu lidiku lyobulwani.

⁴ Kandi mu lidiku yilyo virenge vivye vi la singira ku kigulu kya Muzeituni, ki henza Yerusalemi ku luvega lwevugwe; kigulu kya Mu zeituni zana ki ladika hagati hakyo, kuhenza ivugwe ne madioli, livona li la va ho linene ligali; na luvega lulala lwekigulu lu la twula kutsia kasikasini, na luvega lundi kutsia kusini.

⁵ Na mwinye mu liruka mwivona lyevigulu vyange; kigira livona lyevigulu zana li la duka Azeli; yee, mu liruka, kuli mwiruka imbiri welidegera lyekivala mu madiku ga Uzia mwami wa Yuda; na Yahova Nyasaye wange a ladza, na vatakatifu vosi va la va halala nive.

⁶ Na ga la duka mu lidiku yilyo, ubulavu si bu la va nobwaaku kinga nekisundi:

⁷ navutswa li ia va lidiku lilala lya manye kana ku Yahova; si gu veye mbasu kinga ubudiku: navutswa ga la va, inyinga yomgolova ubulavu bu la va ho.

⁸ Na ga la duka ku lidiku yilyo, amadzi ga veye mwoyo ga la twula mu Yerusalemi; luvega lulala kugo ga la tsia ku luvega lwenyanza yevugwe, na luvega lwago lundi ga la tsia ku luvega lwenyanza ye madioli: ga la va ndiyo inyinga yoluya noku inyinga yobukindu.

⁹ Na Yahova a la va Mwami welirova lyosi: mu lidiku yilyo Yahova a la va mulala, na lieta lilye lilala.

¹⁰ Na kivala kyosi ki la girunkannya kuli kivala kereremu, kutwula Geba kuduka Rimon ku luvega lwa kusini wa Yerusalemi; na li la gingwa igulu, nokumenya habugono halyo, kutwula ku kiribwa kya Benjamini kuduka ku kiribwa kyokutanga, kuduka ku kiribwa kyolwiga, nokutwula ku kitaradzi kya Hananeli kuduka ku vyokumina iwaini vyomwami.

¹¹ Avandu va la menya mu, si ha la va nelilaama kandi mba; navutswa Yerusalemi li la menya nemirembe.

¹² Kandi ipelegi ya Yahova a la duyira avandu vosi avalwana na Yerusalemi, ni yiyi: tsinyama tsyemibiri gyavo tsi la nyanyika ni va singiye nevirenge vyavo, tsimoni tsyavo tsi la nyanyika mu mitwe gyavo, na tsinimi tsyavo tsi la nyanyika mu minwa gyavo.

¹³ Na ga la duka ku lidiku yilyo, kivi ki twula ku Yahova ki la va hagati havo; navo va la gumirana mukono sa mulaia no wakye, kandi sa mulala mukono gwigwe gu la gingwa igulu ku mukono gwo wakye.

¹⁴ Na Buyuda i la lwana ha Yerusalemi; na butugi bwetsihiri tsyosi tsyetsimbega tsyosi bu la vungidzwa halala, ithahabu na ifetha, na tsingubo, vinyingi ligali.

¹⁵ Ni ndiyo ipelegi yeparasi i la va, na yenyumbu, na yeng'amia, na yesukiri, na yetsinyama tsyosi tsi li va ho mu hokusosa, kuli ipelegi yiyi.

¹⁶ Kandi ga la duka, sa mulala u tigala wetsihiri tsyosi tsya duka kulwana ne Yerusalemi a lanegira muhiga nomuhiga kusigamira Mwami, Y ahova wa mahe, nokulomba lilia lyamadiri.

¹⁷ Kandi ga la duka ku vosi ku bwiko bwosi ubu veye mu lirova u vula kwanegira Yerusalemi kusigamira Mwami uyu, Yahova wa mahe, imbula si i la kupa kuvo mba.

¹⁸ Na bwiko bwa Egepeti ni va vula kwanegira, kinga ni va vula kudza, imbula si i la kupa kuvo mba; ipelegi i la va ho, ya Yahova a duyira tsihiri tsi vula kwanegira kutsia kulomba lilia lyamadiri.

¹⁹ Yili ni likalaga li la va ku Egepeti, na likalaga li la va ku tsihiri tsyosi tsi li vula kwanegira kutsia kulomba lilia lyamadiri.

²⁰ Mu lidiku yilyo ku vikuli vi veye ku tsiparasi vi la ng'odwa ku makuva yaga BUTAKATIFU Ku YAHOVA; na viju vi veye mu inyumba ya Yahova vi la va kuli tsindavo tsi veye ha mbiri hobwali.

²¹ Yee, ku viju vyosi mu Yerusalemi, nomu Buyuda vi la va vitakatifu ku Yahova wa mahe; na vosi ava haananga vihaanwa va ladza kuvivugula, nokudekera mu tsinyama: kandi mu lidiku yilyo si a la va ho Mukanani mu inyumba ya Yahova wa mahe.