Zekaria 11 - KITABU KITAKATIFU

¹ Igula miliangu gyigyo, O Lebanon, muliru gu duke kusamba mitaragwa gyigyo.

² Kupa tsikwili O cyprus, kigira mutaragwa gu gwiye, kigira misala milahi gyonomlyeywi: mu kupe tsikwili mwinye misala gya Bashan, kigira mulitu gwetsingulu gwiki hasi.

³ Mwoyo gwelikupa tsikwili gwa avayi kigira ubukumi bwavo bwononnyeywi: mwoyo gwelifwuma lyeving'ang'a visoleli kigira luyai lwa Yordani lwononnyeywi.

⁴ Yahova Nyasaye wange a vola; Waye kyayo kyokwiitwa;

⁵ ama, gondi ga yavo ava veye nago viita, navo velanga avene ava ta li neli, hyola ku kindu; na yavo ava ga gulidzanga va vola, Yahova a gasi dzwe, kigira inze mbeye mutugi; na yavo avayi vago avene si va ga vererera mba.

⁶ Kigira inze si nda vererera ava menyanga mu kivala yiki kandi mba, Yahova a vola: navutswa henza, nda va vika sa mulala mmukono gwomutende wewe, nommukono gwomwami wewe: na va la kuya kivala, na si nda va honnya kutwula mmakono gavo.

⁷ Kuna ngwa ndaya kyayo kyokwiitwa, ligali avang'afu vekyayo. Na ndenyolera tsimpimbo tsiviri; indala nda gi gulika Ubulahi, neyindi nda gi gulika Viboheru; na ndaya kyayo.

⁸ Na nda twulidza avayi vavaka ku mweli mulala; kigira va luhidza mwoyo gwange, navo kandi myoyo gyavo gya ndunyira.

⁹ Ma nda vola, Si ndaya mwinye kandi: u kudzanga, a kudze; na u twulidzangwa a twulidzwe; na va tigala va lie sa mulala inyama yomubiri gwa wakye.

¹⁰ Na nda vugula impimbo yange ya langwa Ubulahi, nda gi vunannya vihiru viviri, nduke kwononnya lilagana lyange lya nda lombn na avandu vosi.

¹¹ Lyononnywa mu lidiku zana yilyo; ni ndiyo avang'afu mu kyayo yavo avambulira va manya yili li veye likuva lya Yahova.

¹² Na nda va volera, Ni mu lola bulahi, mu mbe amadanyi gange; ni ga va ni ga ta veye ndiyo, mu leke. Ma va ngerera vidonye makumi gavaka gefetha kuva madanyi gange.

¹³ Na Yahova ya mbolera, U sigisira mulongi, livalidza lilahi yili lya yavo va validza inze. Ma nda vugula vidonyi makumi gavaka vyefetha, na va sigisira mulongi, mu inyumba ya Yahova.

¹⁴ Ma nda vunannya vihiru viviri impimbo yange ya kaviri, ya langwa Viboheru, nduke kwononnya ubumitu bwa li hagati ha Yuda na israeli.

¹⁵ Na Yahova ya mbolera, U vugule kandi viju vyomwayi musiru.

¹⁶ Kigira, henza, nda singeridza mwayi mu kivala, u li vula kutsia kuhenza yavo avagoti, kinga kwenya avasalannywa, kandi si a la honya avononnywa, kinga kulagiridza ava veye avalamu; navutswa a la lia inyama yomubiri gwomukomeru, nokutandula tsimbagayu tsyavo.

¹⁷ O bayaye umwayi u ta konya kindu, u lekanga kyayo kivavi ki la va ku mukono gwigwe, noku imoni yeye ye nomukono mulungi: mukono gwigwe gu la va mwumu ligali, nemoni yeye yenomukono mulungi i la va kilive ligali.