Zefania 2 - KITABU KITAKATIFU

¹ Mwivungidze halala, yee, mu vunge halala, O ive ihiri u ta veye netsisoni;

² lwa lilaga li kikiri kwi vula, lwa lidiku yilyo li kikiri kuvita kuli mukuudzi, lwobutima bululu bwa Yahova bu kikiri kuduka ku mwinye, lwa lidiku lyobutima bwa Yahova li kikiri kuduka ku mwinye.

³ Mwenye Yahova, mwinye vosi avahokya velirova, ava gumiranga likalaga lilye; mwenye ubulungi, kandi mwenye ubuhokya: namusia mu la viswa mu lidiku lyobutima bwa Yahova.

⁴ Kigira Gaza li la lekwa hatswa na Ashikelon li la va hatswa; va la twulidza Ashidodi inyinga yombasu hagati, na Ekiron li la kunyulwa.

⁵ O bayaye ku va menyanga ha luginga lwenyanza, ihiri ya Vakerethi Likuva lya Yahova li veye ku ive O Kanani, kivala kya Vafilisiti; nda ku dividza a luhe a vule kuva ho mumenyi mu ive kali mulala.

⁶ Na luginga lwenyanza lu la va kyairu, na ha la va nevidioli vyavayi, nevigo vyamagondi.

⁷ Na luginga lu la va lwavatigala venyumba ya Yuda; va laya magondi gavo ha zana; inyinga ya mgolova va la gona mu tsinyumba tsya Ashikelon; kigira Yahova Nyasaye wavo a ladza kuvo, nokugalukidza lyadikidza lyavo.

⁸ Mbuliye amanyega ga Moabu nekihenyahenye kyavana va Amon amanyego ga vanyeganga avandu vange, nokwegingira avene ku lwako lwavo.

⁹ Kunangwa kuli inze mbeye mwoyo, Yahova wa mahe a vola Nyasaye wa Israeli, Ligali Moabu a la va kuli Sodoma, navana va Amon va la va kuli Gomora, ha la va miyandu gyelitambadza, nobogo bwo munyu, na hatswa kazozo: navandu vange va eigala va la va lanya, na va tigala ve ihiri yange va la va nyola kuva miyandu.

¹⁰ Va la nyola yaga kigira luyai lwavo, kigira va lega avandu va Yahova wa mahe na kwiyidzominya kuvo.

¹¹ Yahova a la va litihidza kuvo; kigira a la ng'ahidza avanyasaye vosi velirova navandu va la sigamira uyu, sa mulala hango hehe, kali visulu vyosi vyetsihiri.

¹² Na mwinye Avethiopia, mu liitwa nekivavi kyange.

¹³ Naye a la nyira mukono gwigwe ku luvega lwa kasikasini, nokudividza Asuria; Nineve a la li kola kuva hatsua, ne Iyumu kuli kyangalangwi.

¹⁴ Na vyayo vyetsing'ombe vi la gona hagati hehe, netsinyama tsyosi tsyetsihiri; neling'ang'a nekirungu vi la gona ku buguliliru bwatsyo; myoyo gyavo gyi la hulirwa mu madirisha: mu mukingi gwalyo ha la va hatswa: kigira u lang'aminye miyinzi gyomutaragwa.

¹⁵ Yili ni lidala lyobusangala li menyanga bugira kuganagana, lya vola mu mwoyo gwalyo, Inze mbeye ho, si ha veye nowundi navutswa inze: ga veye ndi gwiye hatswa, kandi hetsinyama tsyombulimu tsi menya sa mulala u vita ahimbi kulyo a la kunuka nokusung'usa mukono gwigwe.