Zaburi 97 - KITABU KITAKATIFU

¹ Yahova yamehanga; lirova li sangale; Ubunyingi bwevisulu vi yanze.

² Malesi na kisundi vi mu kumbiridza: Ubulungi na likalaga vi veye muse gwentebe yeye yobwami.

³ Muliru gu mwimiriranga, Na gu sambanga avasigu veve hosi.

⁴ Luheni lwilwe lwa hema mu lirova: Lirova lya lola ni li degera.

⁵ Vigulu vya saluluka kuli masang'asa imbiri wa Yahova, Imbiri wa Mwami welirova lyosi.

⁶ Magulu ga landidza ubulungi bwibwe, Na avetsihiri vosi va loli ubukumi bwibwe.

⁷ Ava tumekira vifwananyi vya vadzwa va lole teisoni Avegingiranga ku vifwananyi: Mwinye avanyasaye vosi mu sigamire Uyu.

⁸ Zioni lya hulira ni li sangala, Na avakana va Yuda va yanza Kigira likalaga lilyo, O Yahova.

⁹ Kigira ive, O Yahova, u veye igulu ligali kuvita lirova lyosi: Ive u nenehidzwa igulu ligali wa avanyasaye vosi.

¹⁰ O mwinye ava yanza Yahova, mu dunyire ubwoni: A lindanga myoyo gyavatakatifu veve; A va honnya kutwula mu mukono gwavadamano.

¹¹ Ubulavu bu midzirwa avalungi, Na ubusangali ku yavo ava li nomwoyo mulahi.

¹² Mu sangale mu Yahova mwinye avalungi; Na mu santidze lieta lilye litakatifu lyokwidzulitswa.