Zaburi 86 - KITABU KITAKATIFU

Lisaala lya Daudi.

¹ O Yahova, u yekidze ugutu gugwo, na u ntivulire; Kigira inze mbeye mudaka namudambi.

² U honnye mwoyo gwange; kigira mbeye u tidzanga ive: O ive Nyasaye wange, u honnye mutumekiri wowo u suuviranga ive.

³ U mbere tsimbabasi, O Mwami; Kigira nzanira ive lidiku lyosi bei.

⁴ U yanzidze mwoyo gwomutumekiri wowo; Kigira ng'ingi mwoyo gwange ku ive, O Mwami.

⁵ Kigira ive, Mwami, u veye mulahi, na mwangu kusameha, Na wobunyingi bwetsimbabasi ku vosi avanira ive.

⁶ U tegidze ugutu ku lisaala lyange, O Yahova; Na u hulire mwoyo gwelihomba lyange.

⁷ Mu lidiku lyekivi kyange ndanira ive; Kigira u la ntivulira.

⁸ Si ha li nowundi hagati ha vanyasaye, u veye kuli ive, O Mwami; Si ha li nelikola lindi li veye kuli likola lilvo.

⁹ Tsihiri tsyosi tsya wa lomba tsi la sigama imbiri wowo, O Mwami; Na va la kuminya lieta lilyo.

¹⁰ Kigira u veye munene, na u kolanga vyokugenva: Ive weng'ine u veye Nyasaye.

¹¹ U nzegidze inzira yoyo, O Yahova; nda genda mu ageligali gogo: U kole mwoyo gwange kuva mulala kutia lieta lilyo.

¹² Ndidzominya ive, O Mwami Nyasaye wange, nomwoyo gwange gwosi; Na nda kuminya lieta lilyo mihiga nemihiga.

¹³ Kigira tsimbabasi tsitsyo tsi veye tsinene ku inze; Na u honnyi mwoyo gwange kutwula mu Kihadisi kya hasi ligali.

¹⁴ O Nyasaye, avekirage va ntwuliye, Na kiduma kya vekizalo venyanga mwoyo gwange, Na si va viki ive imbiri wavo.

¹⁵ Navutswa ive, O Mwami, u veye Nyasaye welivererera na tsimbabasi, Wa galaha ku butima, na munene wetsimbabasi na ageligali.

¹⁶ O wirane ku inze, na u mbere tsimbabasi; U he mutumekiri wowo tsingulu tsitsyo, Na u honnye mwana womutugwa mukana wowo.

¹⁷ U mmannye lilolekidza lyobulahi Yavo ava ndunyiranga, va la lole va ve isoni Kigira ive, Yahova, u mbonnyi, nokuleminya mwoyo gwange.