Biblia Todo Logo
Bìoball air-loidhne

- Sanasan -

Zaburi 75 - KITABU KITAKATIFU


Ku Munene Wetsinyimbu; Zaburi ya Asafu, Lwimbu.

1 Ku ku santidza, O Nyasaye; Ku ku santidzanga, kigira lieta lilyo li veye himbi: Avandu va vola likola lilyo lyobugenyi.

2 Lwa nda nyola inyinga i lagwa, Nda kalaga likalaga lyobulungi.

3 Lirova li saluluki halala na ava menyi mu vosi: Inze mwene nsingeridzi tsitiru tsyalyo. [Selaha

4 Nda volera avigingiri, Mu ta kola ubwigingiri; Na avadamano, Mu ta gingaulwiga:

5 Mu ta ginga ulwiga lwenyu igulu; Mu ta vola neligoti lidinyu.

6 Kigira lyeginga si li twulanga ivugwe, kinga imadioli, Kandi si li twula kusini.

7 Navutswa Nyasaye a veye muka lagi: A gehidzanga mulala, nokunene hidza wundi.

8 Kigira mu mukono gwa Yahova, ki veye mu kikombe kyewaini kiviravira lifwulu; Kizuye vitsukannyeywi, naye ya vi tsuka: Ligali avadamano velirova vosi va la komheridza amaseke, nokuganwa.

9 Navutswa inze nda landidza mihiga nemihiga Nokwimba tsyokwidzominya Nyasaye wa Yakobo.

10 Tsinziga tsyosi tsyavadamano, nda tsi kalaga; Navutswa tsinziga tsyavalungi tsi la gingwa.

©Bible Society of Kenya, 1967

Bible Society of Kenya
Lean sinn:



Sanasan