Zaburi 71 - KITABU KITAKATIFU

¹ O Yahova, nsuuviranga mu ive; U ta ndeka mihiga nemihiga kuva isoni.

² Ku bulungi bubwo u mbonnye na u mboholole: U yekidze gutu gugwo ku inze, na u mbonnye.

³ U ve ku inze lwanda lwobumenyi bwange, lwokwingira mu kazozo: U mali kulaga mbonywe; Kigira ive u veye lwanda lwange, na impinga yange.

⁴ O Nyasaye wange, u ntwulidze mmukono gwomudamano, Ku mukono gwomundu u ta li mulungi na wekirage.

⁵ Kigira ive u veye lisuuvira lyange, O Mwami Yahova: Ive u veye lisuuvira lyange kutwula bwana buke.

⁶ Nsingeridzeywi nive kutwula ku livulwa lyange; Ni ive wa ntwulidza mmunda mwa mama wange: Lidzominya lyange li la va ku ive kazozo.

⁷ Inze mbeye kyokugenya ku avanyingi; Navutswa ive u veye kyokwivisa mu kyange kyetsingulu.

⁸ Munwa gwange gu lizula nelidzominywa lilyo, Kandi nobukumi bubwo lidiku lyosi bei.

⁹ U ta nsyuva inyinga yobusakulu bwange; U ta ndeka inyinga yetsingulu tsyange tsi geha.

¹⁰ Kigira avasigu vange va tala lieta lyange; Navo ava gonekanga mwoyo gwange va volerana.

¹¹ Ni va vola, Nyasaye u mu leki vutswa: Mu mu londe na mu mgumire; kigira si ha veye nowokumu honnya.

¹² O Nyasaye, u ta va ihale ku inze; O Nyasaye wange, u kole bwangu kunkonya.

¹³ Yavo avasigu vomwoyo gwange va ve isoni na va heridzwe; Va kunikwe nelileganywa nelivula kwidzominywa avenyeranga inze kivi.

¹⁴ Navutswa nda suuvira kazozo, Na nda kwidzominya munonono kuvita.

¹⁵ Munwa gwange gu la vola ubulungi bubwo, Kandi ubuhonnyi bubwo lidiku lyosi bei; Kigira si manya livalidzwa lyabuo.

¹⁶ Ndadza nevikolwa vyetsingulvya Mwami Yahova: Ndidzulitsa avandu ubulungi bubwo, na bubwo bweng'ine.

¹⁷ O Nyasaye, ive u nzegidzi kutwula bwana buke; Nokuduka kalunu nandidzanga makuva gevikolwa vivyo vyokugenya.

¹⁸ Yee, kali lwa mbeye musakulu nowetsimbudze, u ta ndeka, O Nyasaye, Nduhe mbole tsingulu tsitsyo ku kisukululwi yiki, Na ubunyali bubwo ku vosi avadzanga.

¹⁹ Kandi, O Nyasaye, ubulungi bubwo bu veye igulu ligali; U koli vindu vinene O Nyasaye, ibwaha u leng'ana na ive?

²⁰ Ive u ku mannyi kivi kinyingi na budamano, U la ku singeridza kandi, Nokukutwulidza kandi mu ng'ani.

²¹ Ive u mede ubunene bwange, Wirane kandi u leminye mwoyo gwange.

²² Kandi ndidzominya ive nobukana, Kali ageligali gogo, O Nyasaye wange: Nda kupira ive limuga kukwidzominya O ive, Mutakatifu wa Israeli.

²³ Minwa gyange gyi la kupa lwanga lwobusangali, lwa nyimba lidzominywa lilyo; Na mwoyo gwange gwa u honnyi.

²⁴ Ululimi lwange lu la vola ubulungi bubwo lidiku lyosi bei; Kigira yava avenyeranga inze kiviva veye isoni na va leganniywi.