Zaburi 7 - KITABU KITAKATIFU

Lwimbu lwa Daudi yimbira Yahova kigira makuva ga Kushi Mubenjamini

¹ O Yahova, Nyasaye wange, nzirukira ku ive: U mbonnye ku vosi ava nondanga, nokumbonnya,

² Gase va la tandula mwoyo gwange kuli king'ang'a, Nokugudonyannya ha vule kuva na u honnyangwa.

³ O Yahova Nyasaye wange, ni mba ni nda kola yibu; Na mmakono gange ni mu va ni mu veye nobukyamu;

⁴ Ni mba ni nzirannyi ubudamano ku uyu u veye nemirembe ku inze (Yee, mmali kuhonnya uyu u veye mudambidzi wange bugira kindu);

⁵ Kunangwa musigu wange a twulire mwoyo gwange, nokugugumira; Yee, a duvage livamwoyo lyange hasi mmarova, Nokuvika ubukumi bwange mu lugukyi [Selaha

⁶ U vuke, O Yahova, nobutima bubwo; Wenenehidze ku butima bwa vasigu bwange, U mbukire; u mali kulaga likalaga.

⁷ Livugana lya avandu li ku kumbiridze; Na ive wirane igulu kigira u veye igulu kuvo.

⁸ Yahova a la kalagira avandu: U nkalagire, O Yahova, kuli bulungi bwange, na kuli ubudukanu bu veye ku inze.

⁹ Ubudamano bwa avadamano bu heridzwe, navutswa u dinyeridze avalungi: Kigira Nyasaye mulungi a geridza tsiganagani na myoyo.

¹⁰ Ingavo yange i veye ku Nyasaye, U honnyanga avemyoyo milungi.

¹¹ Nyasaye a veye mukalagi mulungi, Yee, Nyasaye u veye nobutima kazozo.

¹² Mundu na a vula kwirana, a la hyagala kivavi kikye; U mali kunyira buta bwibwe nokubuhingira;

¹³ U mu lohidziye viyuma vyelikudza; A kolanga mibano gyigye kuva gyolumema lwomuliru.

¹⁴ Hene, mudamano a lumangwa kwivula ubudamano; Yee kivi ki veye inda yeye, na yivula ubugadi.

¹⁵ U mali kuyava ubogo, nokubulomba, Naye mwene u gwiye mu bogo bwa ya yava.

¹⁶ Kivi kikye ki lirana ku mutwe gwigwe, Na kirage kikye ki lika ku lwote lwilwe.

¹⁷ Ndidzominya Nyasaye kuli ubulungi bwibwe Na nda gasidza lieta lya Yahova U Veye Igulu Ligali.