Zaburi 51 - KITABU KITAKATIFU

Ku Munene Wetsinyimbu. Zaburi ya Daudi lwa Nathan muprofeti ya duka kuye, lwa ya mala kwingira ku Bath Sheba

¹ Umbere tsimbabasi, O Nyasaye, kuli tsimbabasi tsyobuyanzi bubwo: Kuli ubunyingi bwetsimbabasi tsitsyo u ntwulidze mahyolo gange.

² U nzogidze ligali ubudamano bwange Na u ndavidze ubwoni bwange.

³ Kigira nzeyama mahyolo gange mwene Na ubwoni bwange bu veye imbiri wange kazozo.

⁴ Ku ive, ive weng'ine, nkoli ubwoni, Nokukola ubudamano yibu imbiri wowo; Ive u veye nobulungi mu livola lilyo, Nokuva mutakatifu mu likalaga lilyo.

⁵ Henza, ndivulwa mu liva lyobwoni; Kandi mama wange ya mbereka mu bwoni.

⁶ Henza, ive u yanzidzwa na ageligali mugati mwevivero vyange; Na mu vivero viviseywi u la nzegidza ubugeeri.

⁷ U ntakase na husupo, na nda va munifu: U nzogidze, na nda va mulavu kuvita likonza.

⁸ U nkole kuhulira ubusangali nobuyanzi, Vigumba vya wa vunannya vi duke kusangala.

⁹ U vise mmoni mumwo mu ta henza ubwoni bwange, Na u twulidze vidamano vyange vyosi.

¹⁰ U nombere mwoyo mulavu, O Nyasaye; Kandi u nzirannyire roho muhya mugati mwange.

¹¹ U ta nsyuva ntwule imbiri wowo; Kandi u ta twulidza ku inze Roho Mutakatifu wowo.

¹² Wiranyire ku inze ubusangali bwobuhonnyi bubwo; Kandi u ndire na roho gwelilalira.

¹³ Kunangwa ndegidza avamahyolo tsinzira tsitsyo; Na avobwoni va lirana ku ive.

¹⁴ U ntwulidze ku kisalya kya masahi, O Nyasaye, ive Nyasaye wobuhonywi bwange; Kunangwa ululimi lwange lu lahanzuka kwimba ubulungi bubwo

¹⁵ O Mwami, u boholole minwa gyange; Na munwa gwange gu la lang'aminya lidzominywa lilyo.

¹⁶ Kigira ive si u sangaliranga kihaanwa; nkano nda ki haana: Si u yanzidzangwa na kihaanwa kyokusambwa.

¹⁷ Vihaanwa vya Nyasaye vi veye roho gu vuniki: Mwoyo gu vuniki na gu miniki O Nyasaye, si u li gu lega mba.

¹⁸ U kolere Zioni bulahi mu liyanzidza lilyo: Wombake madigi ga Yerusalemi.

¹⁹ Kunangwa u la yanzidzwa mu vihaanwa vyobulungi, Nomu kihaanwa kyokusambwa na kihaanwa kyokusambwa kyosi: Inyinga zana va la haana tsigiriki ku bwali bubwo.