Zaburi 49 - KITABU KITAKATIFU

Ku Munene Wetsinyimbu. Zaburi ya avana va Kora.

¹ Mu hulire yaga, mwinye avetsihiri tsyosi; Mu tegidze amatu, mwinye vosi ava menyanga mu lirova,

² Ava hanzahanza na avanene, Avatugi na avadaka halala.

³ Munwa gwange gu la vola agobugeeri; Na tsiganagani tsyomwoyo gwange tsi la va tsyelimanya.

⁴ Nda yekidza ugutu gwange kuhulira lugano: Nda kunula nobukana kikunikiru kyange.

⁵ Kigira ki nduke kutia mu madiku gobudamano, Inyinga ubudamano bwavandambidza bu nkumbiridza.

⁶ Ava suuviranga ubutugi bwavo, Nokwigingira ku bunyingi bwobutugi bwavo;

⁷ Si ha veye nomulala kuro u nyala ku vyosi kutungira amwavo wewe Kinga kuha Nyasaye mitungu gyamwavo wewe

⁸ (Kigira litungira myoyo gyavo li veye linene ligali, Nalyo si li nyalika mihiga nemihiga),

⁹ A duke kuva nelivamwoyo mihiga nemihiga, Na a vule kulola ligunduluka.

¹⁰ Kigira a lolanga avageeri va kudza; Musiru navo avombiri vosi halala va diva, Na va lekera avandi ubutugi bwavo.

¹¹ Liganagana lyomu mwoyo li veye, tsinyumba tsyavo tsi la menya mihiga nemihiga, Na hokumenya havo ha la hindira kuduka ku visukululwi vyosi; Va gulika ameta gavo ku milimi gyavo avene.

¹² Navutswa mundu welidzominywa si a menya mihiga gyosi: A veye kuli tsinyama tsi divanga.

¹³ Inzira yavo yiyi i veye ubusiru bwavo: Navutswa inyima wavo avandu va bugirira livola lyavo. [Selaha

¹⁴ Kuli magondi va hilangwa mu kilindwa; Likudza li la va mwayi wavo: Mugamba avalungi va la va netsingulu kuvo; Na ligondo lyavo li la gulula na li la va lyekilindwa, ki la li kaminya, Kuduka ha vula kuva hokumenya halyo.

¹⁵ Navutswa Nyasaye a la tungira mwoyo gwange ntwule mu tsingulu tsyekilindwa Kigira a la mbugula. [Selaha

¹⁶ U ta tia lwa mulala a kolwa mutugi, Lwa ubukumi bwenyumba yeye bu medeka:

¹⁷ Kigira lwa a kudza si a la hila kindu halala naye; Ubukumi bwibwe si bu liika inyima wewe.

¹⁸ Kali lwa ya li mwoyo yegasidza mu mwoyo gwigwe (Na avandu va kwidzominya lwa wekolanga ubulahi).

¹⁹ A la tsia ha makula ga vaguga veve; Va la vula kulola ubulavu mihiga gyosi.

²⁰ Mundu u veye mu lidzominywa na a vula kumanya, A veye kuli tsinyama tsi divanga.