Zaburi 42 - KITABU KITAKATIFU

KITABU II Ku Munene Wetsinyimbu. Lyegidza ya Avana va Kora.

¹ Kuli imboongo i herananga ku visenukiru vyamadzi, Na ndiyo mwoyo gwange gu herananga ku ive, O Nyasaye.

² Mwoyo gwange gu veye nobuluhu ku Nyasaye, ku Nyasaye u veye mwoyo: Nda duka kuloleka imbiri wa Nyasaye inyinga ki?

³ Amaliga gange ga li vyokulia vyange ubudiku na mbasu, Lwa va nteva mbasu bei, Nyasaye wowo a veye haliha?

⁴ Vindu yivi nzidzulitsa, nokutsuka mwoyo gwange mu inze, Kuli nda tsia nekiduma, nokukimirira mu inyumba ya Nyasaye, Nomwoyo gwelisangala nogwelidzominya, kiduma ki lindanga lidiku lyokusangala.

⁵ Kigira ki winamanga, O mwoyo gwange? Na kigira ki u hendanga mu inze? U suuvire Nyasaye; kigira nda duka kumwidzominya, Kigira ubuhonnyi bwomumoni mwimwe.

⁶ O Nyasaye, mwoyo gwange gwinami mu inze: Kunangwa nzidzulitsa ive kutwula mu kivala kya Yordani, Noku vigulu vya Herimon, na kigulu kya Mizari.

⁷ Luliva lu hanzukira luliva ku lihuma lyekihirira kikyo: Vihudzudzi vivyo na viguvuli vivyo vyosi vi vitanga ku inze.

⁸ Navutswa Yahova a la laga tsimbabasi tsyobuyanzi bwibwe inyinga yombasu; Na mbudiku lwimbu lwilwe lu la va na inze, Kali lisaala ku Nyasaye welivamwoyo lyange.

⁹ Nda volera Nyasaye lwanda lwange, Kigira ki u nziviriye? Kigira ki ntsitsanga nobuverereri ku lidambidza lyomusigu wa nge?

¹⁰ Kuli kivavi ki veye mu vigumba vyange, avadambidzi va nye ganga, Lwa va tevanga kazozo, Nyasaye wowo a veye haliha?

¹¹ Kigira ki winamanga, O mwoyo gwange? Na kigira ki u hendanga mu inze? U suuvire Nyasaye; kigira nda duka kumwidzominya, Uyu u veye ubuhonyi bwommoni mwange, na Nyasaye wange.