Zaburi 34 - KITABU KITAKATIFU

Zaburi ya Daudi; inyinga yekola kuli mulalu Imbiri wa Abimeleki, wa mu kunga, na a tsia.

¹ Nda gasidza Yahova tsinyinga tsyosi: Lidzominywa lilye li la va mmu nwa gwange kazozo.

² Mwoyo gwange gu ligingira mu Yahova: Avahoma va la hulira yaga nokuva nesango.

³ Mwidzominye Yahova mwinye na inze, Kandi kwidzominye lieta lilye halala.

⁴ Nda saava Yahova, naye ya ntivulira, Na ya mbonnya ku gosi ga nda tia.

⁵ Va mu henzera, ni va ng'ereng'anywa; Na mumoni mwavo si va li kuva netsisoni mihiga gyosi.

⁶ Mudaka uyu yanira, na Yahova ya mu hulira, Na ya mu honnya ku vivi vivye Vyosi.

⁷ Ingelosi ya Yahova a kumbiridzanga yavo ava mu tidzanga, Na a va hedzanga ubwiyangu.

⁸ Mu tsatsame, mu lole Yahova a veye mulahi: A veye nobugasu wevisanga muye.

⁹ O mu tie Yahova, mwinye avatakatifu veve; Kigira ava mu tidzanga si va geheranga kindu.

¹⁰ Ving'ang'a visoleli vi dakanga, ni vi veye nenzala; Navutswa yava avenyanga Yahova si va li daka kindu kilahi.

¹¹ Mwinye avana mudze, mu mbulire: Nda mwegidza litibwa lya Yahova.

¹² Ni musatsa ki u kayirangwa liva mwoyo Na a yanza madiku manyingi, a lole ubulahi?

¹³ Twulidza ululimi lulwo ku budamano, Na u gaye minwa gyigyo gyi ta vola ubugadi.

¹⁴ Weyahule ku budamano, na u kole ubulahi; Wenye mirembe, na u gyi londetsimbiru.

¹⁵ Tsimoni tsya Yahova tsi veye ku avobulungi, Na amatu gege ga yeki ku lilira lyavo.

¹⁶ Mmoni mwa Yahova mu veye ku yavo ava kolanga ubudamano, Kutema kyokuvidzulitsa kyavo ki ta va mu lirova.

¹⁷ Avalungi va lira, na Yahova ya va hulira, Na ya va honnya ku busaliri bwavo bwosi.

¹⁸ Yahova a veye himbi kuvo ava vuniki mwoyo, Na a honnyanga yavo ava miniki roho

¹⁹ Avalungi va veye nevivi vinyingi; Navutswa Yahova a mu honnyanga ku vyosi.

²⁰ A lindanga vigumba vivye vyosi: Si ki veye ho kilala kuvyo ki vuniki.

²¹ Ubudamano bu liita avadamano; Na yavo ava dunyira avalungi va la kalagirwa.

²² Yahova a tungiranga myoyo gyavatumekiri veve; Na kali mulala kuvo avivisanga muye si a la kalagirwa mba.