Zaburi 33 - KITABU KITAKATIFU

¹ Mu sangale mu Yahova, O mwinye avalungi: Lidzominya li dukiranga avemyoyo milungi.

² Mu santidze Yahova nobukana: Mwimbe tsinyimbu kuye nelimuga lyemigoye likumi.

³ Mu mwimbire ulwimbu luhya; Mu kupe nobusidza no mwoyo munene.

⁴ Kigira likuva lya Yahova ni lilungi; Na miyinzi gyigye gyosi gyi veye nobusuuvirifu.

⁵ A yanzanga ubulungi na likalaga lidukiru: Lirova lizuye tsimbabasi tsyobuyanzi tsya Yahova.

⁶ Ligulu lya lombwa nelikuva lya Yahova, Na lihe lyalyo lyosi lya lombwa nomwika gwomunwa gwigwe.

⁷ A vungidzanga amadzi genyanza kuva kitumi: A vikanga ubunyingi bwetsinyanza mu magungi.

⁸ Avelirova vosi va tie Yahova: Avomulirova va mu tie nobugenyi.

⁹ Kigira ya vola, ma ga kolwa; Ya laga, na lya singiridzwa.

¹⁰ Yahova a kolanga litovola lya vetsihiri kuva vutswa; Kandi a kolanga tsiganagani tsya avandu kuvula kukola kindu.

¹¹ Litovola lya Yahova li singiranga mihiga nemihiga, Tsiganagani tsyomwoyo gwigwe tsi duka ku visukululwi vyosi.

¹² I veye nobugasu ihiri ya Yahova a veye Nyasaye wayo, Avandu ava ya tovola kuva miyandu gyigye mwene.

¹³ Yahova a henza kutwula migulu; A lolanga avana vosi va avandu;

¹⁴ Hango helimenya lilye a henzanga Ku avomulirova vosi,

¹⁵ Uyu u longanga myoyo gyavo vosi, Na a manya miyinzi gyavo gyosi.

¹⁶ Si ha veye nomwami u honnywa nobunyingi bwelihe: Kandi wetsingulu si yehonnya netsingulu tsitsye tsinene.

¹⁷ Iparasi i veye kindu kya vutswa ku bukonyi; Kandi si i honnya mulala netsingulu tsyayo tsinene.

¹⁸ Henza, imoni ya Yahova i veye ku yavo ava mu tidzanga, I veye ku yavo ava suuviranga tsimbabasi tsitsye

¹⁹ Ku twulidza mwoyo gwavo mu likudza Nokuvakola kuva mwoyo inyinga yenzala.

²⁰ Mwoyo gwetu gu lindiriye Yahova: A veye ubuhonnyi bwetu na inga vo yetu.

²¹ Kigira mwoyo gwetu gu la sangala muye, Kigira ku suuviye lieta lilye litakatifu.

²² Tsimbabasi tsyobuyanzi tsitsyo tsi ve ku kwinye, O Yahova, Kuli ku suuviye ive.