Zaburi 32 - KITABU KITAKATIFU

Zaburi ya Daudi. Ubugasu bwelisamefwa.

¹ A veye nobugasu uyu wamahyolo gege ga sameheywi, Wobwoni bwibwe bu kunikeywi.

² A veye nobugasu mundu uyu wa Yahova a vula kuvalidza kuye ubukyamu, Kandi uyu wobugadi bu ta li mu mwoyo gwigwe.

³ Lwa nda kiring'ana, vigumba vyange vya kunguha Mu likenya lyange mbasu bei.

⁴ Kigira mbasu nobudiku mukono gugwo gwa mmina ligali: Ubukindu bwange bwa girunkanywa kuva ubuhyu bwombasu mululu. [Selaha

⁵ Ndeyama ubwoni bwange imbiri wowo, Na si nda visa ubukyamu bwange: Nda vola, Ndeyamira Yahova mahyolo gange; Na ive wa sameha ubukyamu bwobwoni bwange. [Selaha

⁶ Kigira yaga ku vosi u tia Nyasaye a saale ku ive inyinga ya u nyoleka: Ligali inyinga amadzi manene gizula si ga la duka kuye.

⁷ Ive u veye impinga yange; u la ninda inyinga yekivi; U la nkumbiridza netsinyimbu tsyobuhonywi. [Selaha

⁸ Nda ku ha ubugeeri nokukwegidza inzira ya u li vitira ku: Nda kwimirira nemoni yange.

⁹ Mu ta va kuli iparasi, kinga kuli inyumbu, tsi ta ii nelimanya; Tsyeminwa gyatsyo gyi dukirwa kugayidzwa nelijamu na ulu kova, Tsi la duka himbi ku ive.

¹⁰ Ubuvereri bunyingi bu la va ku vadamano Navutswa uyu u suuviranga Yahova, ubuyanzi bu la mu kumbiridza tsimbega tsyosi.

¹¹ Mu sangale mu Yahova, nokutsantsalika, mwinve avalungi; Kandi mu kupe isango, mwinye vosi avemyoyo milungi.