Zaburi 30 - KITABU KITAKATIFU

Zaburi: Lwimbu lwo Kwidikel'la Inyumba. Zaburi ya Daudi.

¹ Ndidzominya ive, O Yahova; u ndiguluye, Na si u leki avasigu vange kusangala ku inze.

² O Yahova Nyasaye wange, Nzanira ive, na ive u mbonnye.

³ O Yahova, u twulidzi mwoyo gwange mu Kihadisi; U lindi livamwoyo lyange, mbule kutsia mbogo.

⁴ Mwimbire Yahova lidzominywa, mwinye avatakatifu veve, Mu santidze lieta lilye litakatifu lyokwidzulitswa.

⁵ Kigira ubutima bwibwe bu veye bwedagika indala vutswa Tsimbabasi tsitsye tsi veye tsyamadiku gosi gelivamwoyo; Namusia lilira li la va ho ubudiku Navutswa mugamba ubusangali bulavaho.

⁶ Inyinga yobulahi bwange, inze nda vola, Si nda dendeya madiku gosi.

⁷ Ive, O Yahova, ku tsimbabasi tsitsyo u dinyiridzi kigulu kyange: Wa visa mumoni mumwo, ma nda dambidzwa.

⁸ Ndanira ive, O Yahova; Na ku Yahova nda saala.

⁹ Ubulahi ki bu veye mmasahi gange, lwa ntsia mbogo? Ulugukyi lu nyala kukusantidza? Iu nyala kulandidza ageligali gogo?

¹⁰ U hulire, O Yahova, na u mbere tsimbabasi: Yahova, u ve Muhonnyi wange.

¹¹ U ngirunkannyeye ubuvereri bwange kuva lisangala U navuye ingubo yange yeligunia, na u mbiki ingubo yobusangali;

¹² Kuduka ubukumi bu kwimbire lidzominywa, na bu la vula kukiring'ana. O Yahova Nyasaye wange, nda ku santidza mihiga nemihiga.