Zaburi 25 - KITABU KITAKATIFU

Zaburi ya Daudi.

¹ Ku ive, O Yahova, ng'inga mwoyo gwange.

² O Nyasaye wange, nku suuviye, U ta ndeka kuva netsisoni U ta leka avasigu vange kwegingira ku inze.

³ Yee, ava lindiriranga ive si va la va netsisoni, kali mulala: Yavo ava kolanga ubugadi bugira kivune va la va netsisoni.

⁴ U mmannye tsinzira tsitsyo, Yahova; U nzegidze imihanda gyigyo.

⁵ U nzimirire mu ageligali gogo, na u nzegidze; Kigira u veye Nyasaye wobukonyi bwange; Nindirira ive mbasu pei.

⁶ O Yahova, widzulitse tsimbabasi tsitsyo, na ubuyanzi bubwo Kigira vi veye ho kutwula kale.

⁷ U tidzulitsa ubwoni bwobwana buke bwange, kinga mahyolo gange: U nzidzulitse kuli tsimbabasi tsitsyo, Kigira ubulahi bubwo, O Yahova.

⁸ Yahova a veye mulahi na mulungi: Kunangwa a legidza avobwoni ku inzira.

⁹ A limirira avahoma mu bulungi; Na a legidza avahoma inzira yeye.

¹⁰ Tsinzira tsyosi tsya Yahova tsi veye tsimbabasi na ageligali Ku vosi ava gumiranga amalago gege na lilolekidza lilye.

¹¹ Kigira lieta lilyo, O Yahova, U samehe lihyolo lyange, kigira li veye linene.

¹² Ni bwaha mundu uyu u tidzanga Yahova? A la mwegidza inzira ya a li tovola.

¹³ Mwoyo gwigwe gu la menya mu busosi; Na visukululwi vivye vi la nyola miyandu gyekivala.

¹⁴ Aga viswa ga Yahova ga veye ga yavo ava mu tidzanga; Naye a la va mannya lilagana lilye.

¹⁵ Tsimoni tsyange tsi henza ku Yahova kazozo; Kigira a la twulidza virenge vyange mu mutego.

¹⁶ U henzidze tsimoni tsitsyo ku inze, na u mbere tsimbabasi Kigira mbeye tsyeng'ine, na nku pidzangwa kivi.

¹⁷ Ubusaliri bwomwoyo gwange bu nenehidzwa: U ntwulidze mu kivi kyange kyosi.

¹⁸ U henze lidambidzwa lyange na lisaliridzwa lyange; Na u samehe ubwoni bwange bwosi.

¹⁹ U henze avasigu vange, kigira va veye avanyingi Navo va ndunyiranga nobudunyi bululu.

²⁰ U linde mwoyo gwange, na u mbonnye: U ta ndeka kuduka mu tsisoni, kigira ndivisa mu ive.

²¹ Ubudukiru na ubulungi bu ndende, Kigira nindirira ive.

²² U tungire Israeli, O Nyasaye, Kumutwulidza ku kivi kikye kyosi.