Zaburi 20 - KITABU KITAKATIFU

Wetsinyimbu Zaburi ya Daudi.

¹ Yahova a ku tivulire mu lidiku lyekivi; Lieta lya Nyasaye wa Yakobo likalidze ive igulu;

² A tume likonya ku ive kutwula hatakatifu Kandi a ku he tsingulu kutwula Zioni;

³ Yidzulitse vihaanwa vivyo vyosi, Kandi u bugirire vihaanwa vivyo vyokusambwa; [Selaha

⁴ A ku he vyomwoyo gugwo gwenyanga, Kandi a dukidze amakuva gogo gosi.

⁵ Ku la sangala mu buhonnyi bubwo Kandi mu lieta lya Nyasaye wetu ku la singeridza tsibendera tsyetu: Yahova a ku he mateva gogo gosi.

⁶ Kalunu mmanya Yahova a honyanga mbake wewe A la mu tivulira kutwula muligulu lilye litakatifu Nobuhonnyi bwetsingulu tsyomukono gwigwe mulungi.

⁷ Avalala va suuvira magari, navalala va suuvira tsiparasi; Navutswa kwinye ku la tala lieta lya Yahova Nyasaye wetu.

⁸ Yavo vinaminywa ni va gwiye; Navutswa kwinye ku vuki nokusingira bulungi.

⁹ Yahova, u honnye: Mwami a ku tivulire lwa ku langa. Ku Munene.