Zaburi 135 - KITABU KITAKATIFU

¹ Mwidzominye Yahova. Mwidzominye lieta lya Yahova; Mu mwidzominye, mwinye avatumekiri va Yahova.

² Mwinye mu singire mu inyumba ya Yahova Ha mugidzi gwenyumba ya Nyasaye wetu.

³ Mwidzominye Yahova; kigira Yahova a veye mulahi: Mwimbe lidzominya lieta lilye; kigira li yanzidzanga.

⁴ Kigira Yahova u tovoye Yakobo kuva wewe mwene Na Israeli kuva miyandu gyigye mwene.

⁵ Kigira mmanya Yahova a veye munene, Kandi Mwami wetu a veye igulu ku vanyasaye vosi.

⁶ Gosi aga Yahova a yanza, yaga a kola, Migulu na mu lirova, na mu tsinyanza na mu luliva lwosi;

⁷ Uvuyidzanga lilumbe kutwula ku tsindulu tsyelirova; U lombera imbula tsimpeni U twulidzanga imbuudza mu vyagi vivye;

⁸ Wa kuya vyokutanga kwivulwa mu Egepeti, Kutanga ku avandu kuduka ku imitugu;

⁹ Wa hila lilolekidza na vyokugenya hagati hoho, O Egepeti, Noku Farao, noku vatumekiri veve vosi;

¹⁰ Wa kuya tsihiri tsinyingi Nokwiita avami avetsingulu

¹¹ Sihon mwami wa Avamori, Na Ogu mwami wa Bashan Na bwami bwosi bwa Kanani,

¹² Na a haana kivala kyavo kuva miyandu, Miyandu gya avandu veve Israeli.

¹³ O Yahova, lieta lilyo li veye ho mihiga nemihiga; O Yahova lidzulitsa lilyo li dukanga ku makula gosi.

¹⁴ Kigira Yahova a la kalagira avandu veve, Kandi a la vererera avatumekiri veve.

¹⁵ Vifwananyi vyetsihiri vi veye ifetha na ithahabu, Miyinzi gyamakono ga avandu.

¹⁶ Vi veye neminwa, navutswa si vi moloma mba; Vi veye netsimoni, navutswa si vi lola mba;

¹⁷ Vi veye na amatu, navutswa si vi hulira mba; Kandi si ha veye nemiyika mu minwa gyavo.

¹⁸ Ava vi lomba va la fwanana navyo; Yee, ku vosi u vi suuviranga a fwanana navyo.

¹⁹ O inyumba ya Israeli, mu gasidze Yahova: O inyumba ya Haruni, mu gasidze Yahova:

²⁰ O inyumba ya Levi, mu gasidze Yahova: Mwinye ava tia Yahova, mu gasidze Yahova.

²¹ Yahova a gasidzwe mu Zioni, U menyanga mu Yerusalemi. Mwidzominye Yahova.