Zaburi 132 - KITABU KITAKATIFU

Lwimbu Lwokwanegira;

¹ Yahova widzulitse Daudi Ku kivi kikye kyosi;

² Kuli yesuhira Yahova, Na ya lagana ku Uyu Munene wa Yakobo:

³ Ligali si ndingira mu lihema lyenyumba yange, Kinga kunina ku kitali kyange;

⁴ Si nda haana tsindolo ku tsimoni tsyange Kinga litengedza ku vigohe vyange;

⁵ Kuduka nduhe nyolere Yahova hango, Lihema lya Uyu Munene wa Yakobo.

⁶ Henze, kwa ga hulira mu Efaratha; Kwa ga nyola mu mulimi gwomulitu.

⁷ Ku lingira mu mahema gege; Ku la sigamira ha intebe yevirenge vivye.

⁸ U vuke, O Yahova, wingire hoku sosa hoho; Ive, na lisanduku lyetsingulu tsitsyo.

⁹ Avasalisi vovo vevike ubulungi; Avatakatifu vovo va kupe isango yobuyanzi.

¹⁰ Kigira mutumekiri wowo Daudi U tirannya mmoni mwombake wowo.

¹¹ Yahova yesuhira Daudi mu ageligali; Si a lirana inyima kwambakana: Mu lwivulo lwoumbiri gugwo nda ku vikira mundu kwikala ku intebe yoyo yobwami.

¹² Avana vovo ni va va ni va gumira lilagana lyange Na lilolekidza lyange lya ndi vegidza, Avana vavo kandi va likala ku intebe yoyo yobwami mihiga gyosi.

¹³ Kigira Yahova u tovoye Zioni U lyenyi kuva hokumenya hehe.

¹⁴ Hano ha veye hokusosa hange mihiga gyosi; Nda menya hano; kigira nda lyenya.

¹⁵ Nda gasidza ligali vyokulia vya ha zana: Avadaka va ha zana nda vigutidza ubukima.

¹⁶ Kandi avasalisi va ha zana nda va vika ubuhonnyi; Na avatakatifu va ha zana va la kupa isango yobuyanzi.

¹⁷ Ha zana onda kola lwiga lwa Daudi kusibuka. Nombeye mbake wange itaya.

¹⁸ Avasigu veve nda va vika tsisoni; Navutswa kuye mwene itaji yeye i la gasidzwa