Zaburi 128 - KITABU KITAKATIFU

Lwimbu Lwokwanegira.

¹ A veye nobugasu uyu u tidzanga Yahova, Uyu u gendanga mu tsinzira tsitsye.

² Kigira u la lia ku miyinzi gyamakono gogo: U la va nobusangali, na ubugasu bu la va ku ive.

³ Mukali wowo a la va kuli muzabibu gwamanga, Mu inyumba yoyo; Na avana vovo kuli limera lyemezeituni, Kukumbiridza imeza yoyo.

⁴ Henza, na ndiyo a la gasidzwa mundu U tidzanga Yahova.

⁵ Yahova a kugasidze kutwula mu Zioni: Na u lole ubulahi bwa Yerusalemi madiku gosi ga u veye mwoyo.

⁶ Yee, u lole avana va avana vovo. Mirembe gyi ve ku Israeli.