Zaburi 121 - KITABU KITAKATIFU

Lwimbu Lwokanegira.

¹ Nda ginga tsimoni tsyange kuhenza ku vigulu: Ubuhonywi bwange bu la twula haliha?

² Ubuhonywi bwange bu twulanga ku Yahova, Wa lomba ligulu na lirova.

³ Si a li leka kirenge kikyo kutwulidzwa: Uyu u ku lindanga Bi a la gona tsindolo.

⁴ Henza, uyu u lindanga Israeli Si a la tengedza, kandi si a la gona tsindolo.

⁵ Yahova a veye mulindi wowo: Yahova a veye kiriri kikyo ku luvega lwomukono mulungi.

⁶ Mu mbasu liuva si li la ku samba mba, Kandi mweli si gu la ku valira mu budiku.

⁷ Yahova a la ku linda ku bubi bwosi; A la linda mwoyo gugwo.

⁸ Yahova a la linda litwula lilyo na liingira lilyo Kutwula kalunu kuduka mihiga nemihiga.