Zaburi 11 - KITABU KITAKATIFU

Ku Munene Wetsinyimbu; Zaburi ya Daudi

¹ Nzirukira ku Yahova: Mu volera ndi mwoyo gwange U buluke kuli linyonyi kutsia mu kigulu kikyo;

² Kigira, henza, avadamano va nyira buta, Va tegekidza mbano ku mugoye, Va duke kulasira mu kisundi avalungi vemyoyo.

³ Kigira imise ni gyononnywa Avalungi va la kola ki?

⁴ Yahova a veye mu litempeli lilye litakatifu; Yahova, intebe yeye i veye mi gulu; Tsimoni tsitsye tsi lola, vigohe vivye vi geridza, avana va avandu.

⁵ Yahova a geridza avalungi; Navutswa mwoyo gwigwe gu dunyira mudamano, na uyu u yanza kirage.

⁶ Ku vadamano a la vikidzira mitego; Muliru, na kibiridi, na kihudzudzi kyomuliru ki sambanga vi la va kidieli mu kikombe kyavo.

⁷ Kigira Yahova a veye nobulungi; a yanza vikolwa vilungi: Avalungi va la lola mumoni mwimwe.