Zaburi 101 - KITABU KITAKATIFU

Zaburi ya Daudi

¹ Ndimba tsye tsimbabasi tsyo buyanzi na tsye likalaga lilungi: Ku ive, O Yahova, ndimba tsyokwidzominya.

² Inze nda kola agobugeeri ku inzira yobudukiru: Inyinga ki u lidza ku inze? Nda genda nomwoyo mudukiru mu inyumba yange.

³ Si nda vika kindu kidamano imbiri wetsimoni tsyange: Ndunyira miyinzi gya yavo ava gota inzira; Si gyi la ng'umira mba.

⁴ Mwoyo gwokuhinga gu la twula ku inze: Si nda manyana nekindu kidamano mba.

⁵ Uyu u gemeranga mutende wewe makiriri, nda mu twulidza: Uyu u henzanga nobwegingiri, na womwoyo gwoluyai si ndekudzira kuye mba.

⁶ Tsimoni tsyange tsi la va ku avasuuvirifu vekivala, va duke kumenya ninze: Uyu u gendanga ku inzira yobudukiru, a la ntumekira.

⁷ U kolanga ubugadi si a la menya mu inyumba yange mba: U volanga ububehi si a la singeridzwa imbiri wetsimoni tsyange mba.

⁸ Mugamba no mugamba nda twulidza avadamano vosi mu kivala; Nduke kutwulidza mu lidala lya Yahova, ava kola ubwoni vosi.