Yohana 7 - KITABU KITAKATIFU

¹ Inyima yevindu yivi Yesu ya vaya mu Galilaya: kigira si yenya kuvaya Buyuda, kigira Avayuda venya kumwiita.

² Lilia lya Vayuda lya li himbi, lilia lyevidioli.

³ Kigira yaga avamwavo veve va mu volera, Twula hano, u tsie Buvuda, avegidzwi vovo va duke kulola miyinzi gyigyo gya u kolanga.

⁴ Kigira si ha veye nomundu u kola kindu makiriri na mwene yenya kumanyekana. Nu u va nu u kola vindu yivi, wemannye ku avomkivala.

⁵ Kigira kali avamwavo veve si va mu suuvira mba.

⁶ Kigira yaga Yesu ya va volera, Inyinga yange i kikiri kuduka; navutswa inyinga yenyu madiku gosi i duka.

⁷ Avomkivala si va nyala kudunyira mwinye; navutswa inze, va ndunyira, kigira inze ndolekidza miyinzi gyavo ni midamano.

⁸ Mwinye mwanegire mu tsie mu lilia: inze si nyanegira mu lilia yili; kigira inyinga yange i kikiri kuduka.

⁹ Kandi lwa ya mala kuvavolera yaga, ya menva Galilaya.

¹⁰ Navutswa avamwavo veve lwa va mala kwanegira kutsia mu lilia, mwene kandi yanegira si a tsia habulavu navutswa kuli a tsia ma kiriri.

¹¹ Kunangwa Avayuda va mwenya mu lilia, ni va vola, A veye ha li ha?

¹² Kandi limonya linyingi lya duka mu viduma kuye. Avalala va vola, A veye mundu mulahi; avandi va vola, Auwa, navutswa a gada kiduma.

¹³ Navutswa si ha veye nomundu wa vola kuye habulavu kigira va tia Vayuda.

¹⁴ Navutswa lwe lilia lya duka hagati, Yesu yanegira mu litempeli, ni yegidza.

¹⁵ Kigira yaga Avayuda va genya, ni va vola Mundu uyu a manya ndi mang'oda naye na a kikiri kwega?

¹⁶ Kigira yaga Yesu ya va tivulira, na a vola, Me gidzo gange si ga veye gange, navutswa ga uyu wa ntuma.

¹⁷ Ku vosi u lalira kukola ubulaliri bwibwe, a la manya megidzo, ni ga va ni ga veye ga Nyasaye, kinga inze mwene mbola.

¹⁸ Uyu wevolera yenya ubukumi bwibwe bwene: navutswa uyu wenya ubukumi bwa uyu wa mu tuma, uyu a veye weligali, kandi si a veye na ga ta lungiki muye.

¹⁹ Si ya li Musa wa mu ha lilaga? Navutswa si ha veye nomulala ku mwinye u kola lilaga. Kigira ki mwinye mwenya kunziita?

²⁰ Kiduma kya tivula, U veye nelidemone: ibwaha yenya kukwiita?

²¹ Yesu ya tivula na a va volera, Nda kola muyinzi mulala, na mwinye mwosi mwa genya.

²² Musa ya mu ha likebwa (navutswa si lya twula ku Musa, navutswa ku vaguga); na mwinye ku lisabato mu keva mundu.

²³ Ni bu Ii bulahi mundu a kebwa ku lisabato, lilaga ya Musa i tono nywa; kigira ki mwa ndunyira lwa nda kola mundu mulamu ligali ku lisabato?

²⁴ Mu ta kalaga vya mu lola, navutswa mu kalage likalaga lyobulungi.

²⁵ Avalala ku vandu va Yerusalemi va vola, Uyu si a li wa venya kwiita?

²⁶ Kandi henza, u luviriye, navutswa si va mu volera kindu. Avanene va manya ligali, uyu ni Kristo?

²⁷ Navutswa ku manya mundu uyu ha ya twula: navutswa Kristo lwa a lidza si ha veye nomundu a manya ha a twula.

²⁸ Kigira yaga Yesu ya gamba ni yegidza mu litempeli, na a vola, Inze, mwinye mu mmanya, kandi mu manya ha nda twula; kandi si ntsitsa inze mwene, navutswa uyu wa ntuma noweligali, wa mu ta manya mwinye.

²⁹ Inze mmu manya; kigira nda twula kuye, kandi ya ntuma.

³⁰ Kigira yaga venya kumugumira: navutswa si ha veye nomundu wa hila kuye mukono, kigira isaa yeye ya li ni i kikiri kuduka.

³¹ Navutswa vanyingi ku kiduma va mu suuvira; ni va vola, Kristo lwa a lidza, a la kola vilolekidzu kuvita vyomundu uyu a kola naho?

³² Avafarisayo va hulira kiduma ki monya kuye amakuva yaga; ma vasalisi vanene na Vafarisayo va tuma avasikari kutsia kumugumira.

³³ Kigira yaga Yesu ya vola, ha tigaye hakekeke ni mbeye na mwinye, kandi nda tsia ku uyu wa ntuma.

³⁴ M u la nyenya, kandi si mu li nyola: kandi ha inze mbeye, si mu nyala kuduka ho.

³⁵ Kigira yaga Avayuda va volerana avene, Mundu uyu a li tsia ha li ha, ha kwinye ku li vula kumunyola? A la tsia ku avelyavukana lya Vagreki, ni yegidza Avagreki?

³⁶ Ni likuva ki lya ya vola, Mu la nyenya, si mu li nyola; kandi ha inze mbeye, si mu nyala kuduka ho?

³⁷ Ku lidiku lyekiheri, lidiku linene lyelilia, Yesu ya singira na a gamba, na a vola, Mundu na a va na a veye nobuluhu, yadze ku inze a nwe.

³⁸ Uyu u suuvira inze, kuli mang'oda ga vola, Gyi la twula mmwoyo gwi gwe imigera gyamadzi gyelivamwoyo.

³⁹ Navutswa yaga ya vola ku Roho, wa va li nyola, yava ava suuvira kuye: kigira Roho ya li na kikiri kuhaanwa; kigira Yesu ya li na a kikiri kuhebwa ubukumi.

⁴⁰ Kigira yaga aralala ku kiduma lwa va hulira amakuva yaga, va vola Uyu ligali a veye muprofeti zana.

⁴¹ Avandi va vola, Uyu ni Kristo. Navutswa avandi va vola, Kristo a twula Galilaya nkani?

⁴² Mu mang'oda si ga vola, Kristo a livulwa wa Daudi, kandi wa Bethlehemu kadala ka Daudi ya li mu?

⁴³ Ku lihangalidzana lya duka mu kiduma kuye.

⁴⁴ Avalala venya kumugumira; navutswa si ha veye nomundu wa hila kuye makono.

⁴⁵ Kunangwa avasikari vadza ku vasalisi vanene na Vafarisayo, ni va va teva, Kigira ki si mu mu leti?

⁴⁶ Avasikari va tivula, Mundu ku vosi a kikiri kuvola kuli uyu.

⁴⁷ Avafarisayo va va tivulira, Kandi mwinye mu goteywi?

⁴⁸ Ku vanene, ibwaha u suuvira kuye, naho ku Vafarisayo ibwaha?

⁴⁹ Navutswa kiduma yiki ki ta manya lilaga, ki laameywi.

⁵⁰ Nikodemo ya va volera, (uyo wa tsia kuye lwambiri, naye nu mulala kuvo),

⁵¹ Ku lilaga lyetu, ku kalagira mundu, ni ku kikiri kumuhulira nokumanya aga a kola?

⁵² Va tivula ni va mu volera, Ive kandi si u li wa Galilaya? Wenye u lole, si ha veye nomuprofeti u twula Galilaya.

⁵³ Kandi va tsia sa mulala mu.