Yohana 5 - KITABU KITAKATIFU

¹ Inyima ya vindu yivi lya li ho lilia lya Vayuda; kandi Yesu yanegira na a tsia Yerusalemi.

² Mu Yerusalemi lidavalia li veye ho himbi nekiribwa kyamagondi, li langwa mu Luhebraina, Bethesda, li veye netsisimbu tsitanu.

³ Va gona mutsyo kiduma kinene kyavalwaye, avaboku, avaleema, avafwogoya. Va lindanga lidivula lya amadzi.

⁴ Kigira ku tsinyinga, ingelosi yika ku lidivalia ku duvula amadzi, na uyu wingira kutanga lwa amadzi ga duvulwa, ya hona kubulwaye bwosi bwa mu nyola.

⁵ Ya li ho mundu mulala wa li mu budekeranu bwibwe mihiga amakumi gavaka nemihiga gyitanu negyivaka.

⁶ Yesu lwa ya mu lola a gona na a manya ya li ndiyo madiku manyingi, ya mu volera, Wenya u kolwe mulamu?

⁷ Mulwaye ya mu tivulira, Mwami, si mbeye nomundu wokumbika mu lidavalia inyinga amadzi ga duvuka: navutswa inyinga ntsitsanga wundi vingira imbiri wange.

⁸ Yesu ya mu volera, Singira, u vugule kitali kikyo, u gende.

⁹ Kandi nonoho mundu ya kolwa mulamu, na a vugula kitali na a genda. Lidiku yilyo lya li lisabato.

¹⁰ Kunangwa Avayuda va volera uyu wa honnywa, Li veye lisabato, si bu li bulahi ive u ginge kitali kikyo.

¹¹ Navutswa ya va tivulira, Wa li Lu nkola mulamu niye u mboleye, Ginga kitali kikyo u gende.

¹² Ni va mu teva, Ni bwaha mundu u ku voleye, Ginga kitali, u gende?

¹³ Navutswa uyu wa honnywa si ya manya ibwaha wa mu honnya; kigira Yesu ya twula ho, kiduma kya li ho.

¹⁴ Inyima ya yaga Yesu ya mu nyola mu litempeli, na a mu volera, Henza, u koleywi mulamu: u ta kola ubwoni kandi gase kindu kidamano kuvita ki la ku gwira.

¹⁵ Mundu uyo ya tsia na a volera Vayuda ni Yesu wa mu honnya.

¹⁶ Kigira yaga Vayuda va dambidza Yesu, kigira ya kola vindu yivi ku lisabato.

¹⁷ Navutswa Yesu ya va tivulira, Dada wange kali kuduka kalunu a kola miyinzi, na inze nkola miyinzi.

¹⁸ Kigira yaga Vayuda va kira kwenya kumwiita, kigira si yononnya lisabato lyeng'ine navutswa kandi ya langa Nyasaye Dada wewe, ni yekola mwene a leng'ane na Nyasaye.

¹⁹ Kigira yaga Yesu ya tivula na a va volera, Ligali, ligali, mmu volera, Mwana si a nyala kukola kindu mwene, navutswa vya a lola Dada a kolanga: kigira ku vindu vyosi vya a kola, yivi kandi Mwana a kola ndiyo.

²⁰ Kigira Dada a yanza Mwana na a mannya vindu vyosi vya a kolanga mwene: kandi a la mu mannya miyinzi gyi vita yigyi, mwinye mu duke kugenya.

²¹ Kigira kuli Dada a simugukidzanga avakudzi na a va ha liva mwoyo, kandi ndiyo Mwana a hedza vosi va a tovola, liva mwoyo.

²² Kigira Dada si a kalagira mundu, navutswa u mali kuha Mwana likalaga lyosi;

²³ vosi va duke kukuminya Mwana, kuli va kuminya Dada. Uyu a vula kukuminya Mwana kandi si a kuminya Dada wa mu tuma.

²⁴ Ligali, ligali, mmu volera, U hulira likuva lyange, na a suuvire wa ntuma, a veye nelivamwoyo li ta hera mba, kandi si a li nyala kwingira mu likalagirwa, navutswa u mali kutwula mu likudza kuduka mu livamwoyo.

²⁵ Ligali, ligali, mmu volera, Isaa yidza, nayo i mali kuduka yavakudzi va la hulira mwoyo gwo Mwana wa Nyasaye, kandi ava hulira va la duka kuva mwoyo.

²⁶ Kigira kuli Dada a veye neliva mwoyo muye mwene, kandi ndiyo ya ha Mwana a ve neliva mwoyo muye mwene:

²⁷ kandi ya mu ha tsingulu kukola likalaga, kigira a veye Mwana wa Adamu.

²⁸ Mu ta genya ku yaga: kigira isaa yidza ya yavo vosi va veye mu vilindwa va la hulira mwoyo gwigwe,

²⁹ ma va twule mu, yavo va kola bulahi va duke ku lisimuguka lyelivamwoyo; navo ava kola ubudamano va duke ku lisimuguka lyelikalagirwa.

³⁰ Si nyala kukola kindu inze mwene: kuli mbuliranga nkalaga ndiyo; kandi likalaga lyange li veye lilungi; kigira si nyenya ubulaliri bwange, navutswa ubulaliri bwa uyu wa ntuma.

³¹ Ni mba nzelolekidzira, lilolekidza lyange si li veye lyeligali.

³² Wundi a veyo u ndolekidzira; kandi inze mmanya lilolekidza lilye lya a ndolekidzira ni lyeligali.

³³ Mwinye mwa tuma avatumwa ku Yohana, kandi ya lolekidza ageligali.

³⁴ Navutswa lilolekidza lya mbugula si li veye lyomundu: navutswa mbola vindu yivi mwinye mu duke kuhonnywa.

³⁵ Uyo ya li itaya yokwaaduka nokung'ereng'ana; mwinye mwa yanza kusangala mu bulavu bwibwe inyinga inkekeke.

³⁶ Navutswa lilolekidza lya mbeye nalyo li vita lya Yohana; kigira miyinzi gya Dada ya mpa kumaliridza, miyinzi zana gya nkola, gyi ndolekidza, he, Dada ya ntuma.

³⁷ Kandi niye Dada wa ntuma u mali kundolekidza. Mwinye mu kikiri kuhulira mwoyo gwigwe kandi mu kikiri kulola ligondo lilye.

³⁸ Kandi si mu veye nelikuva lilye li menya mu mwinye: kigira mwinye si mu suuvira uyu wa ya tuma.

³⁹ Mwinye mwenya mu mang'oda, kigira mu vola mu la nyola mu, livamwoyo li ta hera mba; kandi yaga nigo ga lolekidza ku inze;

⁴⁰ kandi mwinye si mu yanza kuudza ku inze mu nyole livamwoyo.

⁴¹ Si mbugula ubukumi ku vandu.

⁴² Navutswa mmanya mwinye si mu veye nobuyanzi bwa Nyasaye mu mwinye avene.

⁴³ Inze ndadza ku lieta lya Dada wange, na mwinye si mu mbugirira mba: wundi na a va na a li duka ku lieta lilye mwene, mu la mu bugirira.

⁴⁴ Mu nyala ndi kusuuvira mwinye ava hereridzana ubukumi, mu vula kwenya ubukumi bu twula wa Nyasaye u veye yeng'ine?

⁴⁵ Mu ta vola, inze nda mu yala wa Dada: mulala a veyo u mu yala, kali Musa, wa mu suuvira.

⁴⁶ Kigira mwinye mu va mu suuvira Musa, nkano mu suuvira inze; kigira ya ng'oda ku inze.

⁴⁷ Navutswa ni mba ni mu ta suuvira mang'oda gege, mu la suuvira ndi amakuva gange?