Yohana 2 - KITABU KITAKATIFU

¹ Ku lidiku lya kola gavaka kya li ho kiserero mu Kana lya Galilaya, kandi mama wa Yesu ya li ho:

² kandi Yesu navegidzwi veve va langwa kutsia mu kiserero.

³ Lwa iwaini ya gehera, mama wa Yesu ya mu volera, Si va veye newaini.

⁴ Na Yesu ya mu volera, Ku veye naki inze nive, Mukali ive? Inyinga yange i kikiri kuduka.

⁵ Mama wewe ya volera avatumekiri, Aga a mu volera, mu kole.

⁶ Tsya li ho tsinyingu tsya magina tsitanu na indala, tsi vikwa kuli miima gyokwogidza gya Vayuda, sendala tsi leng'ana netsisiongo tsiviri kinga tsivaka.

⁷ Yesu ya va volera, Mwizulitse amadzi mu tsinyingu. Ni vizulitsa du.

⁸ Na a va volera, Kalunu mu dahe, mu hilire munene wekiserero. Ni va mu hilira.

⁹ Munene wekiserero lwa ya tsatsama amadzi ga koleywi iwaini, kandi si ya manya wa i twuli (navutswa avatumekiri ava daha, va manya), munene wekiserero ya langa woserereywi,

¹⁰ na a mu volera, Avandu vosi va tanga kuleta iwaini indahi; navutswa lwa va nweye inyingi va leta indamano: navutswa ive u tangi kuvisa iwaini indahi kuduka kalunu.

¹¹ Litanga yili lyevilolekidzu vivye, Yesu ya kola mu Kana lya Galilaya, na a mannya ubukumi bwibwe; kandi avegidzwi veve va mu suuvira.

¹² Inyima ya yaga ya sulunguta Kapernaume, mwene na mama wewe navamwavo navegidzwi veve; ni va menya madiku ga ta li manyingi.

¹³ Kandi lipasaka lya Vayuda lya li himbi, Yesu yanegira na a tsia Yerusalemi.

¹⁴ Kandi ya nyola mu litempeli ava gula tsing'ombe namagondi namakuulu, nava kirannya tsishilling vikaye.

¹⁵ Na a lomba kyokukuyira nemigoye minyerere, na a va kunga vosi mu litempeli, amagondi netsing'ombe; na a salidza tsishilling tsya va kirannya na a kunaminya tsimeza tsyavo;

¹⁶ na a volera ava gula makuulu, Mu twulidze vindu yivu yimu; mu ta kola inyumba ya Dada, inyumba yokugulana.

¹⁷ Navegidzwi veve vidzulitsa ga ng'odwa, Lididikana lyenyumba yoyo li la ndia.

¹⁸ Kunangwa Avayuda va tivula ni va mu volera, U ku mannya kilolekidzu ki, kigira nu u kola vindu yivi?

¹⁹ Yesu ya tivula na a va volera, Mwononnyi litempeli yili, na inze nda li singeridza ku madiku gavaka.

²⁰ Kigira yaga Avayuda va vola, Litempeli yili lya li mu lyombakwa mihiga makumi gane nemihiga gyitano na mulala, na ive u la li singeridza ku madiku gavaka?

²¹ Navutswa ya vola ku litempeli lyomubiri gwigwe.

²² Lwa ya simugukidzwa kutwula mu vakudzi, avegidzwi veve vidzulitsa ya vola yaga; ni va suuvira amang'odwa nelikuva lya Yesu ya vola.

²³ Lwa ya li mu Yerusalemi ku lipasaka, inyinga yelilia vanyingi va suuvira ku lieta lilye, va lola vilolekidzu vya ya kola.

²⁴ Navutswa Yesu mwene si ya va suuvira mba, kigira ya manya avandu vosi

²⁵ kandi si ya li neliyenya iyomundu a mu lolekidzire amakuva gomundu; kigira mwene a manya aga veye mu mundu.