Yohana 17 - KITABU KITAKATIFU

¹ Yesu ya vola yaga, na a digulukidza tsimoni tsitsye igulu, na a vola, Dada, isaa i mali kuduka u kuminye Mwana wowo, Mwana a duke kukuminya ive:

² kuli ive wa mu ha tsingulu ku inyama yemibiri gyosi, vosi va wa mu ha a va he livamwoyo li ta hera mba.

³ Kandi livamwoyo li ta hera mba ni yili va duke kumanya ive, Nyasaye weligali weng'ine, na uyu wa wa tuma, Yesu Kristo.

⁴ Mmali kukukuminya mu lirova; kandi mmali miyinzi gya wa mpa kukola.

⁵ Nive kalunu u mbuminye, Dada, halala nive mwene nobukumi bwa nda li nabwo halala nive, lirova li kikiri kuva.

⁶ Lieta lilyo mmali kuvuulira avandu va wa mpa ku avomkivala: va li avovo, nive wa mpa; kandi va gumiye likuva lilyo.

⁷ Kalunu va manya vyosi vya wa mpa vya twula ku ive:

⁸ kigira amakuva ga wa mpa, inze mali kuvaha; navo va ga vugula, kandi va manya ligali nda twula ku ive, kandi va suuvira ni ive wa ntuma.

⁹ Inze mba saavira: si nsaavira avomkivala, navutswa nsaa vira yavo va wa mpa; kigira va veye avovo:

¹⁰ vyosi vi veye vyange ni vivyo, kandi vivyo ni vyange: na inze mbuminyeywi kuvo.

¹¹ Inze si mbeye mu lirova kandi, navutswa yava va veye mu lirova, na inze ntsitsa ku ive. Dada Mutakatifu, u va linde ku lieta lilyo va wa mpa, va duke kuva kindu kilala kuli kwinye.

¹² Lwa nda li navo halala, nda va denda ku lieta lilyo va wa mpa: kandi nda va linda, kandi si ha veye nomulala kuvo wa gota, navutswa mwana wobudivi; amang'oda ga duke kudukidzwa.

¹³ Navutswa kalunu ndadza ku ive; na yaga mbolera mu lirova, va duke kuva nobuyanzi bwange bwizule muvo.

¹⁴ Mmali kuvaha likuva lilyo; kandi avomki vala va va dunyira, kigira si va veye ku vomkivala, kuli inze si mbeye ku vomkivala.

¹⁵ Si nku saava u va twulidze mu lirova, navutswa u va linde ku mudamano.

¹⁶ Si va veye ku vomkivala, kuli inze si mbeye ku vomkivala.

¹⁷ U va takase mu ageligali: likuva lilyo ni ageligali.

¹⁸ Kuli wa ntuma kutsia mu lirova, kandi ndiyo inze nda va tuma kutsia mu lirova.

¹⁹ Na inze nzetakase kigira kuvo, avene va duke kutakaswa mu ageligali.

²⁰ Kandi si nsaavira yava veng'ine navutswa nsaavira kandi yavo ava suuvira ku inze kigira likuva lyavo;

²¹ vosi va duke kuva kindu kilala; kuli ive, Dada, u veye mu inze, na inze mu ive, kandi navo va duke kuva mu kwinye: avomkivala va duke kusuuvira ive wa ntuma.

²² Kandi ubukumi bwa wa mpa, inze mmali kuvaha; va duke kuva kindu kilala, kuli kwinye ku veye kindu kilala;

²³ inze muvo, na ive mu inze, va dukidzwe kuva kindu kilala; avomkivala va manye ive wa ntuma, kandi ive u va yanza kuli u nyanza.

²⁴ Yava ava wa mpa, Dada, ha mbeye inze nyenya yava va ve ho, va duke kulola ubukumi bwange, bwa wa mpa: kigira wa nyanza, lirova li kikiri kutemwa muse.

²⁵ Dada mulungi, avomkivala si va ku manya, navutswa inze nda ku manya; kandi yava va manya ive wa ntuma;

²⁶ na inze mmali kuvamannya lieta lilyo, kandi nda va mannya; ubuyanzi bwa wa nyanza nabwo bu duke kuva muvo, na inze muvo.