Yohana 14 - KITABU KITAKATIFU

¹ Mu ta henda myoyo gyenyu: suuviri Nyasaye, mu suuvire inze kandi.

² Mu inyumba ya Dada wange i veye nobumenyi bunyingi; ni i ta veye ndiyo, nkano nda mu volera; kigira ntsitsa kumulombera ubugono.

³ Kandi ni mba ni ntsia kumulombera ubugono, nzidza kandi, kandi nda mwingiridza inze mwene; ha mbeye inze, mwinye kandi mu ve ho.

⁴ Na ha ntsia mu manya; na mu manya inzira.

⁵ Tomasi ya mu volera, Mwami, ha u tsia si ku manya; ku manya ndi inzira?

⁶ Yesu ya mu volera, Inze niyo inzira, nageligali, nelivamwoyo: si ha veye nomundu u duka ku Dada na a leki inze.

⁷ Ni mba mwa manya inze, nkano mwa manya Dada wange kandi: kutwula kalunu mu mu manya, kandi mu mu loli.

⁸ Filipu ya mu volera, Mwami, u ku mannye Dada, ma ga ku duke.

⁹ Yesu ya mu volera, Tsinyinga yitsi tsyosi mbeye halala ne mwinye, nive u ta manya inze, Filipu? U lola inze u loli Dada; kigira ki u vola, U ku mannye Dada?

¹⁰ Si u suuvira inze mbeye mu Dada, na Dada a veye mu inze? Amakuva ga mmu volera si nga vola inze mwene: navu tswa Dada a veye mu inze a kolanga miyinzi gyigye.

¹¹ Mu suuvire inze mbeye mu Dada, na Dada a veye mu inze: kinga mu suuvire inze kigira miyinzi gyeng'ine.

¹² Ligali, ligali mmu volera, Uyu u suuvira inze miyinzi gya nkolanga naye kandi a la gyi kola; kandi a la kola minene ku vita yigyi; kigira inze ntsitsa wa Dada.

¹³ Ku vyosi kya mu li saala ku lieta lyange, yiki nda kola, Dada a duke kukuminyirwa ku Mwana.

¹⁴ Ni mba ni mu saala kindu ku lieta lyange, yiki nda kola.

¹⁵ Ni mba ni mu yanza inze, mu la gumira malago gange.

¹⁶ Kandi inze nda saava Dada, naye a la mu ha Muko nyi wundi, a ve na mwinye halala mihiga nemihiga.

¹⁷ Naye ni Roho wa geligali, wavomkivala va ta nyala kumuvugula; kigira si va mu lola, kandi si va mu manya: mwinye mu mu manya; kigira a menya na mwinye, naye a la va mu mwinye.

¹⁸ Si ndi mu leka avabisandu: ndadza ku mwinye.

¹⁹ I tigaye inyinga inkekeke, avomkivala si va li ndola kandi; navutswa mwinye mu ndolanga: kigira inze mbeye mwoyo, kandi mwinye mu la va mwoyo.

²⁰ Ku lidiku yilyo mu la manya, inze mbeye mu Dada wange, na mwinye mu veye mu inze, na inze mbeye mu mwinye.

²¹ Uyu u veye namalago gange, na a ga gumira, uyu niye u nyanza: naye u nyanza, Dada wange a la mu yanza na inze nda mu yanza, kandi inze nda mu vuulikira.

²² Yuda (u ta li Iskarioti) ya mu volera, Mwami, ga la va ndi ive u la vuulikira kwinye, navutswa u ta vuulikira avomkivala?

²³ Yesu ya tivula, na a mu volera, Mundu na a nyanza, a la gumira likuva lyange: na Dada wange a la mu yanza kwinye ku ladza kuye, na ku la, menya naye.

²⁴ U ta nyanza si a gumira amakuva gange: kandi likuva lya mu huliranga si li veye lyange, navutswa ni lya Dada wa ntuma.

²⁵ Amakuva yaga mmu volera lwa nkikiri nemwinye.

²⁶ Navutswa uyu Mukonyi, Roho Mutakatifu wa Dada a la tuma ku lieta lyange, a la mwegidza amakuva gosi, naye a la mwidzulitsa gosi ga nda mu volera.

²⁷ Mirembe mmu lekera; mirembe gyange mmu hedza: si mmu ha kuli avomkivala va haana. Mu ta henda myoyo gyenyu, kandi gvi ta va nobu tii.

²⁸ Mwinye mwa hulira kuli nda nmu volera, Ntsitsa, kandi ndadza ku mwinye. Mu va mwa nyanza, nkano mwa sangala, kigira ntsitsa wa Dada: kigira Dada a veye munene kuvita inze.

²⁹ Kandi inze mmu volera kalunu, li kikiri kuduka, lwa li mala kuduka, mu nyale kusuuvira.

³⁰ Si nda mu volera manyingi kandi, kigira munene wavomkivala yadza: kandi si a veye nekindu mu inze;

³¹ navutswa kuli wa Dada ya ndaga, inze nkolanga ndiyo, avomkivala va duke kumanya nyanza Dada. Singiri, ku gende.