Yohana 13 - KITABU KITAKATIFU

¹ Imbiri welilia lyelipasaka, Yesu ya li na a manya inyinga yeye i duki yokutwula mu kivala yiki nokutsia ku Dada, ya mala kuyanza aveve ava li mu kivala, ya va yanza kuduka ku kiheri.

² Kandi inyinga yelilia, setani na a mali kuvika mu mwoyo gwa Yuda Iskarioti wa Simoni kumuzama,

³ Yesu ya li na a manya Dada wewe u mali kumuha vindu vyosi mu makono gege, kandi ya twula ku Nyasaye kandi a tsia ku Nyasaye,

⁴ ya singira ha vyokulia, na a vika ha luvega makoti; kandi ya vugula kitambaya ni yeboha mu kikenge.

⁵ Maku ya tsuka amadzi ku isahani, na a tanga kusavidza virenge vya vegidzwi nokuvyeya nekitambaya kya ya li ni yebohi.

⁶ Ma ya duka ku Simoni Petro. Petro ya mu volera Mwami, ive u savidza virenge vyange?

⁷ Yesu ya tivula na a mu volera, Kya nkolanga ive si u manya kalunu; navutswa u la manya lwe nyima.

⁸ Petro ya mu volera. Si u li savidza virenge vyange mihiga nemihiga Yesu ya mu tivulira, Ni nta ku savidza si u veye nelisanga ninze.

⁹ Simoni Petro ya mu vo lera, Mwami, u ta savidza virenge vyange vyeng'ine navutswa kandi amakono gange nomutwi gwange.

¹⁰ Yesu ya mu volera, U mali kusingwa yenya vutswa yisave vire nge vivye, a veye munifu wosi: kandi mwinye mu veye avanifu, navutswa si mu veye vanifu vosi.

¹¹ Kigira ya manya u li mu zama; yikyo ni kigira ya vola, Si mu veye avanifu vosi.

¹² Kunangwa lwa ya mala kusavidza virenge vyavo, nokuvugula makoti gege, nokwikala kandi, ya va volera, Mu manya kya mmu kolera?

¹³ Mwinye mu nanga Mwegidzi, na Mwami: mu vola bulahi; kigira mbeye ndiyo.

¹⁴ Inze Mwami no Mwegidzi, inze ni mba ni nsavidza virenge vyenyu, ga mu dukira mwe savidzane virenge vyenyu.

¹⁵ Kigira mmali kumugerera, mwinye mu kole kuli inze mmu koleye.

¹⁶ Ligali, ligali, mmu volera, Mutugwa si a veye munene kuvita wa mu tuga; kandi mutumwa si a veye munene kuvita wa mu tuma.

¹⁷ Mwinye ni mu manya vindu yivi, mu veye nobugasu ni mu vi kola.

¹⁸ Si ntali mwinye mwosi: inze mmanya ava nda tovola; navutswa ga duke kukolwa mang'oda, Uyu wa lagira ubukima bwange u gingi liki ku inze.

¹⁹ Kutwula kalunu inze mmu volera, ga kikiri kuduka, lwa ga mala kuduka mu duke kusuuvira inze niye.

²⁰ Ligali, ligali, mmu volera, U bugirira wa inze ntuma a bugirira inze; naye u bugirira inze a bugirira wa ntuma.

²¹ Lwa Yesu ya mala kuvola yaga ya benda mwoyo, na a lolekidza na a vola, Ligali, ligali, mmu volera, Mulala ku mwinye a la nzama.

²² Avegidzwi va henzana ni va hayahayidza, wa ya li kutala ibwaha.

²³ Mulala ku vegidzwi veve, wa Yesu ya yanza, ya li ni yesedema ku kiritu kya Yesu.

²⁴ Simoni Petro ya mu sima, na a mu volera, U ku volere ni bwaha wa ya li kutala.

²⁵ Naye ha yesedema ndi ha luvega ha Yesu, ya mu volera, Mwami, ni bwaha?

²⁶ Maku Yesu ya tivula, Naye uyu wa ndi donge ridza lidonye lyobukima nokumuha. Lwa ya mala kudongeridza lidonye lyobukima ya li vugula na a ha Yuda mwana wa Simoni Iskarioti.

²⁷ Kandi inyima lwa ya vugula lidonye, hene yaho Setani ya mwi ngira. Kigira yiki Yesu ya mu volera, Kya u kola, kola bwangu.

²⁸ Si ha li nomundu kali mulala ku va li ni vikaye ku meza wa manya kigira ki a mu volera ndiyo.

²⁹ Kigira avalala va ganagana, kigira Yuda ya ginga kilinga kyetsishilling, Yesu ya mu volera, Gula vindu vya ku daka vyelilia; kinga, a he avadaka kindu.

³⁰ Naye lwa ya mala kuvugula lidonye ya twula nonoho: na bwa li ubudiku.

³¹ Lwa ya mala kutsia kyova, Yesu ya vola, Kalunu Mwana wa Adamu u kuminyeywi, kandi Nyasaye u kuminyeywi muye.

³² Nyasaye na a va na a kuminywe muye, kandi Nyasaye a la mu kuminya muye mwene, kandi a la mu kuminya bwangu ndi.

³³ M winye avana, ha tigaye hakekeke ni mbeye halala na mwinye. Mu la nyenya: kandi kuli aga nda volera Avayuda, Wa ntsia inze, mwinye si mu nyala kuduka; inze kalunu mmu volera kuli ndiyo.

³⁴ Lilaga lihya mmu laga, nayo ni yili, Mu yanzane; kuli wa inze mmu yanza, kandi mwinye mu yanzane ndiyo.

³⁵ Ku yaga avandu vosi va la mu manya mwinye mu veye avegidzwi vange, ni mba mu yanzana.

³⁶ Simoni Petro ya mu teva, Mwami, u tsia ha li ha? Yesu ya tivula, Wa ntsitsa ive si u nyala kunonda kalunu; navutswa u la nonda lwanyima.

³⁷ Petro ya mu volera, Mwami, kigira ki si nyala kukulonda kalunu? Nda haana livamwoyo lyange kigira ive.

³⁸ Yesu ya tivula, Hene u la haana liva mwoyo lilyo kigira inze? Ligali, ligali, nku volera, Idaywa ni i ta lagula, ive u la nyambakana hali kavaka.