Yohana 1 - KITABU KITAKATIFU

¹ Mu litanga ya li ho Inkuva, kandi Inkuva ya li ho halala na Nyasaye, kandi Inkuva ya li Nyasaye.

² Wa zana ya li mu litanga halala na Nyasaye.

³ Vindu vyosi vya lombeka ku uyu; kandi bugira uyu si vya lombeka kali kilala ku vyosi vya lombeka.

⁴ Muye lya li liva mwoyo; na liva mwoyo lya li ubulavu bwavandu.

⁵ Ubulavu bu lava mu kisundi; na kisundi si kya bu gumira mba.

⁶ Mundu yadza wa tumwa kutwula ku Nyasaye, lieta lilye lya li Yohana.

⁷ Uyu yadza ku lilolekidza, a lolekidze ubulavu yibu, vosi va duke kusuuvira kigira niye.

⁸ Si ya li ubulavu yibwo, navutswa yadza a lolekidze ubulavu.

⁹ Bwa li ho ubulavu bweligali, bwingira mu lirova ni bu ha avandu vosi ubulavu.

¹⁰ Ya li mu lirova, kandi lirova lya lombeka kuye, kandi lirova si lya mu manya mba.

¹¹ Yadza kuvyo vivye, navo aveve si va mu bugirira mba.

¹² Navutswa vosi ava mu bugirira, ya va ha tsingulu kugwa avana va Nyasaye, va zana ava suuvira lieta lilye:

¹³ ava masahi ga tivula mba, kinga ubulaliri bwo mubiri kinga ubulaliri bwomundu, navutswa ubulaliri bwa Nyasaye.

¹⁴ Inkuva ya gwa mubiri, na a menya halala nekwinye (kandi kwinye kwa lola ubukumi bwibwe, ubukumi bwowivulwa muderwa wa Dada), wizuye tsimbabasi nageligali.

¹⁵ Yohana a lolekidza kuye, na a gamba, na a vola, Uyu niye wa nda mu volera, Uyu udzanga inyima wange u gwiye imbiri wange: kigira ya li imbiri wange.

¹⁶ Nu ku bwizuli bwibwe kwinye kwosi ku nyoye netsimbabasi ku tsimbabasi.

¹⁷ Kigira lilaga lya leterwa ku Musa; tsimbabasi nageli gali ga leterwa ku Yesu Kristo.

¹⁸ Si ha li nomundu wa lola Nyasaye inyinga kali indala; Mwana wivulwa muderwa u veye mu kiritu kya Dada, u mu vuuye.

¹⁹ Kandi yili ni lilolekidza lya Yohana, inyinga Avayuda va tuma avasalisi na Valevi va twula Yerusalemi kumuteva, Ive ni bwaha?

²⁰ Naye yeyama, kandi si yambakana; ni yeyama, Inze si mbeye Kristo.

²¹ Ni va mu teva, Niki kandi? Ive u veye Elija? Kandi ya vola, Si mbeye iye mba. Ive u veye muprofeti uyo? Kandi ya tivula, Auwa.

²² Kunangwa va mu volera Ive ni bwaha? Ku duke kwiranyira ava ku tuma, litivula. Wevolera ndi?

²³ Ya vola, Inze nu mwoyo gwomundu u gamba mwigendanyama, Lungikidza inzira yo Mwami, kuli Isaya muprofeti ya vola.

²⁴ Yavo va tumwa va twula ku Vafarisayo.

²⁵ Kandi va mu teva ni va mu volera, Kigira ki ive u batidza, na ive nu u ta li Kristo, kinga Elija, kinga muprofeti uyo?

²⁶ Yohana ya va tivulira, na a vola, Inze mbatidza mu madzi: hagati henyu mulala u singiye, wa mu vula kumanya,

²⁷ u londa inyima wange, wa nta dukana kuboholola lukova lwekilatu kikye.

²⁸ Vindu yivi vya kolwa mu Betani engereka ya Yordani, wa Yohana ya batidzira.

²⁹ Mugamba ya lola Yesu yadza kuye, na a vola, Henza Mwana weligondi wa Nyasaye, u hila ubwoni bwavomkivala

³⁰ Uyu niye wa nda mu volera, Inyima wange yadza mundu u gwiye imbiri wange: kigira ya li imbiri wange.

³¹ Kandi inze si nda mu manya; navutswa a lolekane na Israeli, yiki ni kigira ndadza ni mbatidza mu madzi.

³² Yohana ya lolekidza, na a vola, Ndoli Roho yika kuli likuulu li twula migulu; kandi va menya kuye.

³³ Kandi si nda mu manya: navutswa uyu wa ntuma kubatidza mu madzi, ya mbolera, Wa u li lola Roho yika na a menya kuye, uyu niye a batidza mu Roho Mutakatifu.

³⁴ Na inze mmali kulola, kandi mmali kulolekidza a veye Mwana wa Nyasaye.

³⁵ Mugamba kandi Yohana ya singira, na vaviri ku vegidzwi veve;

³⁶ na a henza Yesu lwa ya genda, na a vola, Henza Mwana weligondi wa Nyasaye

³⁷ Na vegidzwi vaviri va mu hulira na a vola, ni va londa Yesu.

³⁸ Yesu ya girunkana, na a va lola va mu londanga, na a va volera, Mwenya ki? Ni va mu volera, Rabi (litivula lyalyo li veye kuvola, Mwegidzi, u menya ha li ha?

³⁹ Ya va volera, Hambi, mu la lola. Vadza ni va lola wa ya menya; ni va gona naye lidiku yilyo: ni yenya kuduka isaa i kola likumi.

⁴⁰ Andreya amwavo Simoni Petro, ya li mulala ku vaviri ava hulira Yohana, na a mu londa.

⁴¹ Ya tanga kunyola amwavo wewe mwene, Simoni, na a mu volera, Ku nyoye Mesia (litivula li veye Kristo).

⁴² Ya mu hila ku Yesu. Yesu ya mu henza, na a vola, Ive Simoni mwana wa Yohana: u la gulikwa Kefa (litivula li veye Ligina).

⁴³ Mugamba yenya kutsia Galilaya, na a nyola Filipu: kandi Yesu ya mu volera, U nonde.

⁴⁴ Filipu ya li wa Betsaida, lidala lya Andreya na Petro.

⁴⁵ Filipu ya nyola Natanaeli, na a mu volera, Ku nyoye uyu wa Musa ya ng'oda kuye mu lilaga kandi avaprofeti, Yesu wa Nazareti, mwana wa Yosefa.

⁴⁶ Natanaeli ya mu volera, Kindu kilahi ki nyala kutwula mu Nazareti? Filipu ya mu volera, Hamba, u lole.

⁴⁷ Yesu ya lola Natanaeli yadza kuye, na a vola kuye, Henza, Muisraeli weligali, u ta li nobugadi

⁴⁸ Natanaeli ya mu volera, U mmanyira haliki inze? Yesu ya tivula, na a mu volera, Filipu na a kikiri kukulanga, lwa wa li isi mwomusala gwamakuyu, nda ku lola.

⁴⁹ Natanaeli ya mu tivulira, Rabi, ive niye Mwana wa Nyasaye; ive nu Mwami wa Israeli.

⁵⁰ Yesu ya tivula na a mu volera, Kigira nda ku volera, nda ku lola isi mwomusala gwamakuyu, u suuvira? U la lola vindu vi vita yivi.

⁵¹ Kandi ya mu volera, Ligali, ligali, mmu volera, Mu la lola ligulu ligulika, netsingelosi va Nyasaye va nina ni vika ku Mwana wa Adamu.