Yakobo 5 - KITABU KITAKATIFU

¹ Henzi, mwinye avatugi, mu lire, mu kupe tsikwili, kigira kivi kyenyu kidzanga ku mwinye.

² Ubutugi bwenyu bu mali kugunda, netsingubo tsyenyu tsisere tsi liye.

³ Ithahabu yenyu nefetha yenyu tsi kupi tsisisiniya; netsisisiniya tsyavyo tsi la va kilolekidzu ku mwinye, kandi tsi la lia tsinyama tsyenyu kuli muliru. Mwevikiye akiba mu madiku gekiheri.

⁴ Henzi, amadanyi gavayinziri avagesa milimi gyenyu, aga mwinye mwigalira ku linuula, ga kupa tsikwili: nelilira lya yavo avagesa lingiye mu matu go Mwami Wamahe.

⁵ Mu menyi nobwelemeridzi mu lirova, nokumenya noluyai; mu komeridzi myoyo gyenyu mu lidiku lyokuyaywa.

⁶ Mu kalagiye nokwiita wobulungi; si a hingira mwinye.

⁷ Kunangwa mwikudzire, avamitu, kuduka lidza lyo Mwami. Henzi, mulimi a lindiriranga lyama lyelirova lilahi, kandi yikudziranga kulyo kuduka li luhe li nyole imbula yokutanga neyenyima.

⁸ Na mwinye mwikudzire; mu luviridze myoyo gyenyu: kigira lidza lyo Mwami li veye himbi.

⁹ Mu ta monyana avene navene, avamitu, mu duke kuvula kukalagirwa: henzi, mukalagi u singiye ku viliango.

¹⁰ Avamitu mu vugule avaprofeti ava vola ku lieta lyo Mwami, va ve kyokulolera ku lisaliridza lyobudamano bwa va gwira nokwikudzira kubwo.

¹¹ Henza, ku lola yava kuva nobugasu avikudzira: mu huliye amakuva gobwikudziri bwa Ayubu, kandi mu loli litwekidza lyo Mwami, kuli Mwami wizuye tsimbabasi, nelivererera.

¹² Navutswa kuvita vyosi, avamitu, mu tisuha ku ligulu kinga lirova kinga lisuha lindi ku lyosi: navutswa yee wenyu a ve yee, kandi auwa wenyu a ve auwa, gase mu la gwa mu likalagirwa.

¹³ Mulala ku mwinye a kupanga kivi? A saale. Mulala a veye nekilema mwoyo? Yimbe tsinyimbo.

¹⁴ Mulala ku mwinye a lwala? A lange avakulundu velivugana, va mu saalire nokumuvaka maguta mu lieta lyo Mwami:

¹⁵ lisaala lyelisuuvira li la honnya uyu u veye mulwaye, na Mwami a la mu vukidza; na a va ni ya kola ubwoni, a la samefwa.

¹⁶ Mweyamirane ubwoni bwenyu avene navene, mu saalirane avene navene mu duke kuhonnywa. Lisaala lyomundu mulungi li konya ligali mu likola lyalyo.

¹⁷ Elija ya li umundu weliva lilala nekwinye, kandi ya saala nelisaala imbula i ta kupa; nembula ya vula kukupa ku lirova inyinga ya duka mihiga gyivaka nemyeli gyitano na mulala.

¹⁸ Ma kandi ya saala; neligulu lya leta imbula, kandi lirova lyama lyama lyalyo.

¹⁹ Avamitu, mulala ku mwinye na a gota nokuleka ageligali, na wundi na a mu girunkannya;

²⁰ a manye uyu u girunkannya mwoni kutwula mu ligovera lyenzira yeye, a la honnya mwoyo gwomundu mu likudza, nokukunika ubwoni bunyingi.