Yakobo 4 - KITABU KITAKATIFU

¹ Ubulwani bu twula ha li ha, kandi lihangalidzana li twula ha li ha mu mwinye? Si mu li mu likayirwa lyenyu li kolanga ubulwani mu vivero vyenyu?

² Mu kayirangwa, si mu veye nakyo: mwiitanga kandi mu kolanga imbodoka, kandi si mu nyala kunyola; mu hangalidzana nokulwana; si mu veye nekindu, kigira si mu saalanga.

³ Mu saalanga, si mu nyola, kigira mu saala nobudamano, mu duke kuvitumekira mu likayirwa lyenyu.

⁴ Avobuheyi, si mu manya ubulina bwevyelirova bu veye ubusigu ku Nyasaye? Uyu wenya kuva mulina wevyelirova yekolanga musigu wa Nyasaye.

⁵ Kinga mu ganagana mang'oda ga vola ga vutswa? Roho gwa ya leta kumenya mu kwinye, gu kayirangwa kuduka ku likendeka?

⁶ Navutswa a ku ha tsimbabasi kuvita. Kigira yaga mang'oda ga vola, Nyasaye a hingira avigingiri, navutswa a hedzanga avegehidzi tsimbabasi.

⁷ Kunangwa mwegehidzire Nyasaye; navutswa mu hingire Setani, naye a la mwiruka.

⁸ Mwisunde himbi ku Nyasaye, naye a lisunda himbi ku mwinye. Mu lavidze makono genyu, mwinye avoni; mu takase myoyo gyenyu, mwinye avemyoyo gyiviri.

⁹ Mu kupe kivi, mu verere, mu lire: liseka lyenyu li Kirunkanywe kuva liverera, lisangala lyenyu li ve liverera.

¹⁰ Mwegehidze mwinye avene imbiri wo Mwami, naye a la mu nenehidza.

¹¹ Mu ta monyana avene navene, avamitu, Uyu u monya amwavo wewe, kinga kumukalagira, a monya malago, kandi a kalagira malago: navutswa ive nu u kalagira malago, si u veye mukoli wamalago, navutswa u veye mukalagi.

¹² Mulala weng'ine a veye mulombi wamalago nomukalagi, niye u nyalanga kuhonnya nokudividza: navutswa ive u veye ibwaha u kalagiranga mutende wowo?

¹³ Henzi mwinye, ava volanga, Lero kinga mugamba ku lingira mu lidala yili nokumenya mu muhiga mulala, nokukirannya, nokunyola vyambeti:

¹⁴ navutswa mwinye si mu manya aga na ga ve ho mugamba. Livamwoyo lyenyu li veye ki? Kigira mwinye mu veye mwika ogu loleka inyinga inkekeke, ma gu gota.

¹⁵ Nkano mu vola, Mwami na a yanza ku la va mwoyo, nokukola yaga kinga yaga.

¹⁶ Navutswa kalunu mwiidzominya mu bwigingiri bwenyu: liidzominya lyosi kuli yili li veye lidamano.

¹⁷ Kunangwa u manya kukola bulahi navutswa si ya kola, kuye bu veye ubwoni.