Yakobo 1 - KITABU KITAKATIFU

¹ Yakobo, mutugwa wa Nyasaye nowo Mwami Yesu Kristo, ibaruura yange yiyi, i dukire tsihiri likumi na tsiviri tsye Lisalana, mirembe.

² Mu lole bu veye ubuyanzi bwere, avamitu, inyinga mu gwa mu ligeridzwa tsing'ano netsing'ano.

³ Kigira mu manya ligeridzwa lyelisuuvira lyenyu li letanga ubwikudziri.

⁴ Mu leke ubwikudziri bu ve nemiyinzi gyabwo midukiru, mwinye mu duke kuva avadukiru, navagyima, ava ta daka kindu ku vyosi.

⁵ Navutswa mulala ku mwinye na a va na a daki ubugeeri, a saale Nyasaye, u hedzanga avandu vosi nobuhaani kandi si a vunzulanga: naye a la hebwa.

⁶ Navutswa a saale mu Iisuuvira, a ta hayahayidza ku gosi: kigira u hayahayidzanga a veye kuli kiguvuli kyenyanza kye-rnbuudza i hunzulanga nokusikiswa.

⁷ Kigira mundu uyu a ta ganagana a la nyola kindu ku vyosi ku Mwami;

⁸ mundu wemyoyo gyiviri u degeranga ku tsinzira tsitsye tsyosi.

⁹ Navutswa amitu u veye muyingu yiidzominye mu linenehidzwa lilye;

¹⁰ na uyu mutugi mu ligehidzwa lilye: kigira kuli kimuli kyobulimu ni ndiyo litwulidzwa lilye li veye.

¹¹ Kigira liuva li twula halala nembuudza i sambanga, nokwuminya ubulimu; nekimuli kyabwo ki gwidzanga, nobugasu bwelifwana lyakyo bu gotanga: kandi ndiyo mutugi a la kamuluka mu tsing'endo tsitsye.

¹² A veye nobugasu wikudziranga mu ligeridzwa: kigira na a mali kubugirirwa a la nyola itaji yelivamwoya yo Mwami ya lagira yavo ava mu yanzanga.

¹³ Ku vosi mundu inyinga a geridzangwa a ta vola, Nyasaye a ngeridzanga; kigira Nyasaye si a nyala kugeridzwa nobudamano kandi mwene si a geridzanga mundu ku vosi:

¹⁴ navutswa mundu sa mulala a geridzangwa lwa a ng'usangwa nokutegwa nelikayirwa lilye mwene.

¹⁵ Kandi likayirwa zana lwa li mala kuvereka livulanga ubwoni: nobwoni lwa bu mala kukula bu letanga likudza.

¹⁶ Mu ta gadwa mba, avamitu avayanze.

¹⁷ Vikululirwa vyosi vilahi kandi vihaanwa vyosi vilahi vi veye vidukiru vi twulanga migulu kwika hasi kutwula ku Dada wobulavu, weligirunkannya li ta veye kuye kali kiriri kyeligirunkana.

¹⁸ Ku liyanza lilye mwene u kwivuye nelikuva lyeligali, ku duke kuva kuli ubuhya bwevilombe vivye.

¹⁹ Avamitu avayanze, mu manya likuva yili. Navutswa mundu sa mulala a ve mwangu kuhulira, nomwihuliridzi ku livola, mwikudziri ku butima:

²⁰ kigira ubutima bwomundu si bu kolanga ubulungi bwa Nyasaye.

²¹ Kigira yaga ku livika ha luvega kifwabwi kyosi, nobunyingi bwobudamano, mu vugule nobuhooma likuva li simikangwa li nyala kuhonnya myoyo gyenyu.

²² Navutswa mu ve avakoli velikuva, mu ta va avahuliri vutswa navigadi avene.

²³ Kigira ku vosi mundu u veye muhuliri navutswa si a li mukoli, uyu a fwanana nomundu wehenzeranga mu kyelolero ligondo lya yivulwa nalyo:

²⁴ kigira yehenzanga mwene, ma na a tsia, nonoho yiviriranga kuli yeloli.

²⁵ Navutswa uyu u henzanga malago madukiru ageliboholola, nokumenya mu, uyu si a veye muhuliri wivirira navutswa mukoli wemiyinzi, mundu uyu a la va nobugasu ku likola lilye.

²⁶ Mundu ni yeganagana a veye wedini, naye na a ta boha lulimi lwilwe nelijamu, navutswa a gada mwoyo gwigwe, mundu uyu, idini yeye neya vutswa.

²⁷ Idini ya Nyasaye indahi i ta li nobudamano imbiri wa Nyasaye na Dada wetu ni yiyi, kutsia ku yavo avabisandu noku vakunzakali mu likupa kivi lyavo, nokwilinda ligali mwene a ve bugira imbala yevyelirova.