Vikolwa 5 - KITABU KITAKATIFU

¹ Kandi mundu mulala wa langwa Anania, halala nomukali wewe Safira, ya gula vivye,

² netsindi ku tsishilling ya tsi vaasa makiriri, mukali wewe ya li na a manyi, na a leta kidieli kilala na a ki vika ha virenge vyavatumwa.

³ Navutswa Petro ya vola, Anania, kigira ki Setani a kwizula mwoyo gugwo u volere Roho Mutakatifu ububehi, na u vaase tsindi ku tsishilling tsyo mulimi?

⁴ Inyinga gwa li gugwo si gwa li ubutugi bubwo mwene? Kandi lwa gu mali kugulwa, si gwa li mu tsingulu tsitsyo? Kigira ki u ganagana ndi mu mwoyo gugwo? Si u volera mundu ububehi, navutswa u volera Nyasaye.

⁵ Kandi Anania lwa ya hulira amakuva yago ya gwa hasi na a kudza: ubutii bunene bwa duka kuvo vosi ava ga hulira.

⁶ Kandi avasoleli va singira ni va mu naza, ni va mu hila kyova ni va mu ta.

⁷ Ya duka inyinga yetsisaa tsivaka inyima, mukali wewe yingira, na a ta manyi aga kolwa.

⁸ Petro ya mu volera, Mbolere mwa gula mulimi netsishilling yitsi? Naye ya vola, Yee, kwa gula ndiyo.

⁹ Navutswa Petro ya mu volera, Ga veye ndi, mu lagani kugeridza Roho wo Mwami? Henza, virenge vya yava va teye musatsa wowo vi veye ha kiliango, navo va la ginga ive kandi kukuhila kyova.

¹⁰ Nonoho ya gwa ha vi renge vivye, na a kudza: navasoleli vingira ni va mu nyola na a kudzi ni va mu ginga ni va mu hila kyovs ni va mu ta himbi nomusatsa wewe

¹¹ Ubutii bunene bwa duka ku livugana lyosi, noku vosi ava hulira vindu yivi.

¹² Vilolekidzu nevyokugenya vinyingi vya kolwa mu vandu nemikono gyavatumwa: navo vosi va li mu lusimbu lwa Solomoni mu mwoyo mulala.

¹³ Navutswa kuvo avandi si ha li nomundu wa lema mwoyo kuhambana navo: navutswa avandu va vidzominya;

¹⁴ kandi avasuu viri va daswa ligali ku luvega lwo Mwami viduma vyavasatsa nava kali:

¹⁵ va luha va duka kuhila avalwaye vavo ni va va vika kyova ku tsinzira tsyelidala, kuvalira ku vitali noku visero, Petro na a va na a vita mbula kiriri kikye ki gwire mulala kuvo.

¹⁶ Kandi kiduma kya vugana kya twula mu madala ga li himbi ne Yerusalemi, va leta avandu avalwaye, kandi navo va gumirwa na roho midamano: kandi va honnywa vosi.

¹⁷ Navutswa musalisi munene ya singira, navo vosi ava li halala naye (va li ku lyahuka lya langwa Vasadukayo), vosi vizula likendeka,

¹⁸ ni va gumira vatumwa ni va va boha mu inyumba yavahambe

¹⁹ navutswa ingelosi wo Mwami yigula kiliango kyenyumba yava hambe ubudiku, na a va twulidza, na a vola,

²⁰ Mu tsie, mu singire mu litempeli mu volere avandu amakuva gosi ge Livamwoyo yili.

²¹ Navo lwa va hulira yaga, vingira mu litempeli ni bwenya kukya, ni vegidza. Navutswa musalisi munene yadza, navo ava li naye, ni va vungidza kyina navakulundu vosi va Israeli, kandi va tuma avandu kutsia mu inyumba yavahambe kuvaleta.

²² Navutswa avasikari ava tsia va nyola va ta li mu inyumba yava hambe; virana ni va leta amakuva,

²³ ni va vola, Inyumba yavahambe ku nyoye ni i hani nayo ni indahi, kandi avalindi va singira ha viliango: navutswa lwa kwiguye si ku loli mundu kali mulala.

²⁴ Maku munyampara welitempeli nomusalisi munene, lwa va hulira amakuva yaga, va genva munonono ku yaga, ga la nyala kugwa kindu ki.

²⁵ Yadza mulala na a va volera, Henza, avandu yavo va mwa li ku vika mu inyumba yavahambe, va veye mu litempeli, va singira vegidzanga avandu.

²⁶ Ma munyampara ya tsia halala navasikari na a va leta, navulswa bugira tsi ngulu; kigira va tia avandu, gase va la laswa namagina.

²⁷ Kandi lwa va mala kuvaleta, va va singeridza imbiri wekyina. Kandi musalisi munene ya va teva,

²⁸ na a vola, Kwa mweganehidza ligali mu tegidza ku lieta yili: navutswa henzi, mwizulitsi amegidzo genyu Yerusalemi, mwenya kuleta amasahi gomundu uyu ku kwinye.

²⁹ Navutswa Pe tro navatumwa va tivula ni va vola, Ga kudukira ku hulire Nyasaye kuvita mundu.

³⁰ Nyasaye wavaguga vetu ya simugukidza Yesu wa mwiita, ni mu mu sunga ku musala.

³¹ Uyu Nyasaye u mali kumukuminya nomukono gwigwe mulungi a ve Mwami no Muhonnyi, a duke kuha Israeli lyeganira nobusamehi bwo bwoni.

³² Kandi kwinye ku veye avaloli vamakuva yaga; kandi ndiyo Roho Mutakatifu, wa Nyasaye a mali kuha ava mu hulira.

³³ Navutswa yava lwa va hulira yaga va vihirirwa ni venya kuviita.

³⁴ Navutswa ya singira mu kyina mulala, Mufarisayo, wa langwa Gamalieli, mwegidzi welilaga kandi wavandu vosi vidzominya uyu ya ha munwa kutwulidza avandu kyova inyinga inkekeke.

³⁵ Naye ya va volera, Mwinye avandu va Israeli, mwehenze ku vandu yava ga mwenya'kukola.

³⁶ Kigira lwambiri ku madiku yaga Theuda ya singira, na a vola, Mbeye mundu; va tsia ni va suuvira kuye avandu va duka mbula tsimia tsine: yiitwa; navo vosi ava mu hulira va salanywa ni va gota.

³⁷ Inyima womundu uyu Yuda we Galilaya ya singira mu madiku geling'oda ameta, na a hila avandu va mu londa: naye kandi ya gota; navo vosi ava mu hulira va salanywa.

³⁸ Kandi kalunu mmu volera, Mu leke avandu yava va ve: kigira amakuva yaga nemiyinzi yigyi ni gyi va gyavandu gyi lononywa:

³⁹ navutswa ni gyi va gya Nyasaye, mwinye si mu li nyala kuvaguuta; gase mu la nyolwa mu lwana na Nyasaye.

⁴⁰ Kandi va yanza amakuva gege: lwa va mali kulanga avatumwa imbiri wavo, va va kuya ni va veganehidza va ta vola ku lieta lya Yesu, ni va va leka.

⁴¹ Kunangwa va tsia ni ya twula mu kyina, ni va yanza kigira va validzwa kudukana nokuvikwa mu tsisoni kigira lieta yilye.

⁴² Kandi ma diku gosi mu litempeli nomu inyumba yavo si va leka kwegidza, nokwilwadza amakuva ga Yesu kuli a veye Kristo.