Vikolwa 4 - KITABU KITAKATIFU

¹ Kandi lwa va volera avandu avasalisi nomunene welitempeli na Vasadukayo va va twulira,

² ni va henda mwoyo ligali kigira vegidza avandu, ni vilwadza ku Yesu amakuva gokusimuguka kutwula mu vakudzi.

³ Ni va va gumira nemikono gyavo, ni va va boha mu inyumba kuduka mugamba: kigira gwa li mgolova.

⁴ Navutswa vanyingi kuvo ava hulira likuva va suuvira; kandi livalidza lyavo lya li himbi kuduka tsielfu tsitanu.

⁵ Mugamba avanene vavo, navakulundu, navang'odi va vugana mu Yerusalemi;

⁶ kandi Annas musalisi munene, na Kaiafa, na Yohana, na Alekisandero, navo vosi avenyumba yomusalisi munene.

⁷ Kandi lwa va mala kuvavika mmuse, va va teva, Mu kola yaga netsingulu ki, naho ku lieta ki?

⁸ Ma Petro, yizula Roho Mutakatifu, ya va volera, Mwinye avanene vavandu, navakulundu,

⁹ kwinye ni ku tevwa ndi lero ku muyinzi mulahi gwa kolwa ku mundu wa dekerana, kuli wa ya honnywa mundu uyu;

¹⁰ ga manyekane ku mwinye mwosi, kandi ku vandu vosi va Israeli, ga veye ku lieta lya Yesu Kristo wa Nazareti, wa mwinye mwa bamba, kandi wa Nyasaye ya simugukidza mu vakudzi, ku lieta lilye mundu uyu a singira hano imbiri wenyu mulamu.

¹¹ A veye ligina lya mwinye avombaki mwa lega, kandi lya lombwa li ve mutwe gwo lwiga.

¹² Kandi si ha li nobuhonnyi ku wundi: kigira si ha li nelieta lindi muse mweligulu, lya hebwa mu vandu, li ku niga ku honnywe nalyo.

¹³ Lwa va lola ubuluviriri bwa Petro na Yohana, ni va va manya va veye avandu vatamanyi kandi va ta li avegidzwa, va genya; ni va va manya va li halala na Yesu.

¹⁴ Kandi va lola mundu uyu wa honnywa a singira halala navo, si va li nelikuva lyokutivula.

¹⁵ Navutswa lwa va va ha munwa kutwula mu kyina, va volerana avene,

¹⁶ ni va vola Ku kola ndi avandu yava? Kigira iigali lilolekidza linene li mali kukolwa navo, li loleki ku vosi ava menya mu Yerusalemi; kandi kwinye si ku nyala kwambakana.

¹⁷ Navutswa ga ta landa kandi mu vandu, ku va gaye va ta volerana kandi nomundu ku lieta yili.

¹⁸ Ma va va langa ni va veganehidza va ta vola ligali, kandi va tegidza ku lieta lya Yesu.

¹⁹ Na vutswa Petro na Yohana va tivula ni va va volera, Ni bu va ubulungi imbiri wa Nyasaye kuhulira mwinye kusira Nyasaye, mu manyiridze:

²⁰ kigira kwinye si ku nyala kuleka kuvola vindu vya kwa lola nevya kwa hulira.

²¹ Navo lwa va mala kuvatihidza va va lakuula, va vula kulola kindu kuvaha mageli, kigira avandu; kigira avandu vosi vidzominya Nyasaye ku aga kolwa.

²² Kigira mundu uyu wa kolerwa lilolekidza yili lyokuhonnywa, ya li na a duka imihiga kuvita amakumi gane.

²³ Kandi lwa va lakuulwa, va duka ku avavo, ni va vuula gosi ga vasalisi vanene navakulundu va va volera.

²⁴ Navo lwa va mala kuhulira yaga, va gingira Nyasaye myoyo gyavo halala, ni va vola, O Mwami, wa lomba ligulu, nelirova, nenyanza, nevindu vyosi vi veye mu:

²⁵ wa vola na Roho Mutakatifu, mu munwa gwaguga wetu Daudi mutumikiri wowo, Kigira ki Tsihiri tsya kola kizalo, Navandu va ganagana vindu vya vutswa?

²⁶ Avami velirova vetegeki, Navanene va vugana halala, Kuhing'ana no Mwami kandi na Kristo wewe.

²⁷ Kigira ligali Herodi na Pontio Pilatu, halala ne Tsihiri navandu va Israeli, va vugana halala mu lidala yili kuhing'ana na Yesu Mutumekiri wowo mutakatifu, wa wa vaka maguta.

²⁸ Ku vyosi va kole vyosi vyomukono gugwo nobulaliri bubwo bwa saavira vi kolwe.

²⁹ Kandi kalunu, Mwami, henza litihidza lyavo: u he avatugwa vovo va vole likuva lilyo nobuluviriri bwosi,

³⁰ nive kandi u nyire mukono gugwo kuhonnya; kandi vilolekidzu nevyokugenya vi kolwe ku lieta lya Yesu Mutumekiri wowo mutakatifu.

³¹ Lwa va mala kusaala, ha va vuganira ha degeridzwa; navo vizula Roho Mutakatifu vosi, ni va vola likuva lya Nyasaye nobuluviriri.

³² Kandi kiduma kya yava va suuvira va li nomwoyo mulala na roho mulala: si ha li nomulala kuvo wa vola kindu kya ya li nakyo, ni kyange; navutswa va sanga vindu vyosi.

³³ Navatumwa va twulidza netsingulu tsinene lilolekidza lyavo lyelisimuguka lyo Mwami Yesu: kandi tsimbabasi tsinene tsya li kuvo vosi.

³⁴ Kigira si ha li nomulala wa daka: kigira vosi va li ni va veye nemilimi kinga tsinyumba va tsi gula, ni va leta tsishilling tsyevindu vya gulwa,

³⁵ ni va tsi vika ha virenge vyavatumwa: ni va gavulira vosi sa mulala kuli wa a daka.

³⁶ Kandi Yosefa wa vatumwa va langa lieta lindi Baranaba (lya girunkanywa li vola, Mwana wobuleminyi), Mlevi, navutswa mundu wa Kuporo,

³⁷ ya li nomulimi na a gula na a leta tsishilling na a vika ha virenge vyavatumwa.